Jambyl oblysynyń ákimi Berdibek Saparbaev Qordai aýdanyndaǵy tártipsizdikterge qatysy bar degen kúdikpen ustalǵan azamattardyń týystarymen kezdesti, dep habarlaidy "Ult aqparat" aimaq basshysynyń baspasóz qyzmetine silteme jasap.
Sortóbe aýylynda ótken kezdesýge oblys prokýrory Nurǵalym Ábdirov, UQKD bastyǵy Marat Irmenov, Politsiia departamentiniń basshysy Janat Súleimenov qatysty.
Berdibek Saparbaev ustalǵandardyń týystarynyń ótinishterine qulaq túrip, olardy quqyq qorǵaý organdary mindetti túrde nazarǵa alatynyn jetkizdi. Aimaq basshysy barlyǵy zań aiasynda sheshilýi tiis ekendigin atap ótti.
«Oryn alǵan qaiǵyly oqiǵadan 11 adam ajal qushyp, eki júzge jýyq adam jaraqat aldy. Azamattarymyzdyń múlikteri zaqymdaldy. Eki ai boiy quqyq qorǵaý organdary tergeý amaldaryn júrgizdi. Arnaiy operatsiia barysynda kúdiktiler ustaldy. Eger bireý zańdy buzsa jáne onyń kinási dáleldense, ol tiisti jazasyn alýy tiis. Barlyǵy zań aiasynda bolýy kerek. Bul másele boiynsha túpkilikti sheshimdi sot qabyldaityn bolady», - dep atap ótti B. Saparbaev.
Oblys ákimi jinalǵandardy tártip pen zańdylyqty saqtaýǵa shaqyryp, túrli arandatýlarǵa jol bermeýlerin surady.
