Jambyl oblysynyń Qordai aýdanyna alǵashqy gýmanitarlyq kómek jetkizildi, dep habarlaidy "Ult aqparat" «Habar 24» telearnasyna silteme jasap.
Telearnanyń habarlaýynsha, qazir aýdanda jaǵdai qalypty. Quqyqqorǵaý organdary, Ulttyq ulan sarbazdary, tótenshe jaǵdai salasynyń qyzmetkerleri tynyshtyqty kúzetýde. Sondai-aq ótken túni Sortóbe aýylyna alǵashqy gýmanitarlyq kómek kelip jetken. Ony Jambyl aýdany Jalpaqtóbe aýylynyń turǵyndary erikti túrde jinaǵan. 5 tonna un, 1,5 tonna mai, 2 tonna qant, 2 tonna kúrish, balalarǵa jaialyqtar, jyly kiimder, 10 myń dana dári-dármek shtabqa túsirildi.
«Endi qajet bolǵan jaǵdaida kómekke muqtaj jandarǵa taratý sharalary uiymdastyrylady. Búgin keshke deiin turǵyndar tarapynan qosymsha taǵy 10 tonnaǵa jýyq azyq-túlik, turmysqa qajetti zattar jetkiziledi dep kútilýde.
Sondai-aq búgin mektep, balabaqshalar jumys istei bastaidy. Keshe bilim oshaqtary men mektepke deiingi bilim mekemeleri balalardy qabyldaýǵa ázirlendi. Qazir aýdandyq bilim bóliminiń mamandary mektepterdi aralap, jaǵdaidy kórip, baǵamdap qaitpaq», - dep habarlady telearna.
Eske salaiyq, 7 aqpan kúni Jambyl oblysynyń Qordai aýdanyndaǵy Masanchi aýylynyń turǵyndary arasynda jappai tóbeles boldy. QR Prezidenti Qasym-Jomart Toqaev buzaqylyq sipattaǵy jappai tóbelesti arandatýshylar óz paidasyna qoldanbaq bolǵanyn málimdedi.
Sondai-aq vitse-premer Berdibek Saparbaevtyń tóraǵalyǵymen úkimettik komissiia qurylatynyn, qaza bolǵandardy jerleý, zardap shekkenderge kómektesý jumystary uiymdastyrylatynyn, qoǵamdyq tártipti buzǵandar anyqtalyp, qatań jaýapqa tartylatynyn málim etti. Bas prokýratýraǵa, Ulttyq qaýipsizdik komitetine tiisti tapsyrma berildi.
Tártipsizdikter keiin Qordai, Aýqatty, Sortobe eldi mekenderinde de bolǵan.
8 aqpan kúni Ishki ister ministri Erlan Turǵymbaev pen Aqparat jáne qoǵamdyq damý ministri Dáýren Abaev oqiǵaǵa qatysty elordadaǵy Ortalyq kommýnikatsiialar qyzmetinde baspasóz máslihatyn ótkizdi. Málim etilgendei, janjalǵa basqa aýyldardan kelgen 300-den astam adam qosylǵan. Eki jaq bir-birine tas laqtyryp, taiaqpen uryp, qarý qoldanǵan. Oqiǵa ornynda 8 adam, aýrýhanada 2 adam kóz jumdy. 9 aqpan saǵat 11.00-degi málimet boiynsha, meditsinalyq kómekke 165 adam júgingen. Turǵylyqty jeri boiynsha meditsinalyq uiymdarǵa - 140 adam, Qyrǵyzstandaǵy meditsinalyq uiymǵa - 25 adam jetkizildi. «Qazaqstandaǵy aýrýhanaǵa jatqyzylǵandardyń ishinde turaqty aýyr jaǵdaida 30 adam, al asa aýyr jaǵdaida 8 adam bar. Qaitys bolǵandardyń sany – 10. Oqiǵa ornynda 8, al taǵy 2 adam meditsinalyq mekemede qaitys boldy. Qazirgi tańda áli 8 adam jansaqtaý bóliminde jatyr», - dedi Lázzat Aqtaeva.
Janjaldarǵa qatysy bar degen kúdikpen 47 adam ustalyp, politsiia bólimine jetkizildi. Olardan eki ańshy qarýy tárkilendi. Keiin olardyń 44-i bosatyldy.
QR Qylmystyq kodeksiniń 272-baby (jappai tártipsizdikti uiymdastyrý jáne soǵan qatysý) jáne 99-baby (kisi óltirý) boiynsha sotqa deiingi tergeý amaldary júrgizilýde.
Qordai aýdanynda tótenshe jaǵdai jariialandy. Berdibek Saparbaev basshylyq etken úkimettik komissiia aýdan turǵyndarymen kezdesti, Qordai aýdanynda túngi qaýipsizdiktiń qamtamasyz etilýin tekserdi, etno-mádeni birlestik basshylarymen júzdesti, qaza tapqandardyń úiine baryp, kóńil aitty. Zaqymdalǵan nysandardy qalpyna keltirý jumystary bastaldy.
QR IIM málimetinshe, Qordaidaǵy jappai tártipsizdik kórshiles eki aýyl turǵyndary arasynda bastalǵan.
«Áý basta, iaǵni 5 aqpanda eki aýyldyń turǵyndary ustasyp qalǵan. Turmystyq qaqtyǵysqa qatysqandardyń biri qazir ustalyp, qalǵandary aýdannan shyqpaityny jóninde qolhatpen bosatyldy. Aýyr júk kóligi úiden shyǵyp kele jatqan kezde jolda kele jatqan avtokólikpen jolǵa talasyp qalǵan.Kólikterde úsh-úsh adamnan bolǵan. Aqyry ózara janjal sońy tóbeleske ulasyp ketken», - dedi IIM orynbasary Aleksei Kalaichidi OKQ-da.
Sondai-aq ol jol ústinde tóbelesken alty kisiniń arasynda egde jastaǵy adamnyń bolǵanyn rastady. «Ol tóbeles kezinde zardap shekken... Jalpy qazir biz barlyq taraǵan aqparatqa taldaý júrgizip otyrmyz. Ol jerde júzge tarta adam bolǵan. Olardyń árqaisysynyń sol jerge kelý motivin zerttep jatyrmyz», - dedi ol.
