Qazaqstanǵa kópvektorly memleket bolýdan basqa shyǵar jol joq. Bul týraly QR Tuńǵysh Prezidenti Nursultan Nazarbaev aitty, dep habarlaidy QazAqparat.
«Bizge kópvektorly memleket bolýdan basqa shyǵar jol joq. Soltústik pen batysta Reseimen shektesemiz. Shekara uzyndyǵy – 7,5 myń shaqyrym. Basqa mundai joq. Onyń ústine Reseimen tarihi tamyrlasyp jatyrmyz, birneshe ǵasyr birgemiz. Shyǵys jaǵymyzda Qytai Halyq Respýblikasymen 1,7 myń shaqyrym shekaramyz bar. Ońtústikte islam álemindegi kórshilerimiz ornalasqan. Gegografiiamyz osyndai. Qudaidyń ózi bizge kópvektorly bolýdy buiyrǵan», - dedi Elbasy «Astana klýb-2021» otyrysynda.
Osy oraida Nursultan Nazarbaev elimiz kópvektorlyǵy úshin jii synǵa da iligip jatatyndyǵyn jasyrmady.
«Árine, bul kúrdeli másele. Bizdi osy úshin «kimmen birgesizder?» dep jii synaidy. Reseimen eń jaqsy, úlgi bolarlyq qarym-qatynasymyz bar. QHR-men de qatynasymyz jaqsy, saýda-sattyq pen investitsiia erekshe artyp keledi. Biz kólik haby sanalamyz, saýda-sattyq jasaimyz, ózimiz arqyly Qytaidan Eýropaǵa jáne keri baǵytta júk ótkizemiz. AQSh-pen de jaqsy qarym-qatynastamyz. Eýropalyq odaqpen ekonomikalyq keń aýqymdyq yntymaqtastyq týraly kelisimimiz bar. Islam álemimen de solai. Men munan eshqandai qiyndyq kórip otyrǵan joqpyn», - dedi Elbasy.
