Kópbalaly otbasylarǵa 2 paiyzdyq ipoteka berý mamyrdyń aiaǵynda bastalady. Bul týraly tilshilerge «Qazaqstannyń Turǵyn úi qurylys jinaq banki» AQ basqarma tóraǵasy Lázzat Ibragimova málim etti, dep habarlaidy QazAqparat tilshisi.
«Búgin biz biylǵy mamyrdyń aiaǵynda bastalatyn jańa baǵdarlamany talqylamaqpyz. Bul baǵdarlama az qamtylǵan otbasylardy baspanamen qamtamasyz etýge negizdelgen. Oǵan tórt jáne odan kóp balasy bas otbasylar, múmkindigi shekteýli balany tárbielep otyrǵan otbasylar, tolyq emes otbasylar qatysa alady. Bul otbasylardyń tabysy joǵary emes. Mysaly 12 mln teńge zaim kóleminde alǵashqy 8 jylda tólem 60 myń teńge shamasynda, al qalǵan 11 jylda 44 myń teńge deńgeiinde bolady. Osy baǵdarlama aiasynda qurylys salýshylardan jańa páterdi alýǵa ruqsat etiledi. Sonymen qatar, atalǵan otbasylardyń tańdaýyn keńeitý úshin erterekte paidalanýǵa berilgen páterlerdi, jeke turǵyn úi túrindegi baspanany alý múmkindigi jasalady. Meniń oiymsha, kópbalaly otbasylar úshin elorda mańyndaǵy úiler qyzyǵýshylyq týdyrýy múmkin», - dedi L. Ibragimova QR Tuńǵysh Prezidentiniń Bes áleýmettik bastamasynyń iske asyrylýyn baqylaý jónindegi qoǵamdyq keńes otyrysy aldynda.
Onyń sózine qaraǵanda, qazirgi kezde Turǵyn úi qurylys jinaq bankine osy baǵdarlama boiynsha ótinimder kóptep túsýde.
«Kópbalaly jáne az qamtylǵan otbasylar bul baǵdarlamany asyǵa kútip otyr. Sebebi osy baǵdarlamada nesie boiynsha stavka aitarlyqtai tómen, iaǵni jyldyq eki paiyz. Dál bul baǵdarlamada bastapqy jarna 10 paiyzǵa deiin tómendetildi. 12 mln teńge turatyn páterdi satyp alý úshin salymda 1 mln 200 myń teńge jetkilikti», - dedi ol.
Budan bólek, birqatar oblystardyń, elorda men Almaty jáne Shymkent qalalarynyń ákimdikteri turǵyn úi sertifikattaryn bólý nietin bildirip otyr. Bul óz kezeginde arnaiy áleýmettik kómek retinde jasalmaq. Turǵyn úi sertifikaty kezekte turǵan otbasyǵa beriledi jáne onyń somasy 1 mln teńgege deiin bolady.
Baǵdarlama talaptaryna sáikes, qujat tapsyrý kezinde árbir otbasy turyp jatqan qalasyndaǵy ákimdigine baryp, «Kópbalaly otbasy», «Múmkindigi shekteýli balany tárbielep jatqan otbasy», «Tolyq emes otbasy» sanattary boiynsha kezeke joldama alady.
Budan buryn habarlanǵandai, jaqynda kópbalaly otbasylarǵa baspanany 2-3 paiyzdyq nesiemen berý sharalary mamyrda bastalatyny aityldy.
Aita keteiik, QR Tuńǵysh Prezidenti Nursultan Nazarbaev áleýmettik jaǵynan az qamtylǵan azamattarǵa 2 protsenttik ipoteka berý máselesin qarystyrýdy tapsyrǵan bolatyn. Atalǵan nesie naqty úsh kategoriiaǵa berilýi kerek. Olar - kópbalaly otbasylar, tolyq emes otbasylar jáne múgedek balalary bar otbasylar.
