Kópbalaly otbasylardyń balalaryna beriletin 5 myń grantynyń konkýrsy 5-10 tamyz aralyǵynda ótedi. Bul týraly búgin Úkimet otyrysynda QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«5000 grant kópbalaly jáne áleýmettik kómek alatyn otbasydan shyqqan balalarǵa taǵaiyndalady. Grant qarajaty transfert arqyly jergilikti ákimdikterge beriledi. Olar ózderiniń qajettiligin eskere otyryp, naqty mamandyqtar tizbesin anyqtap, konkýrstyq komissiia quryp, konkýrs júrgizip, grant beredi. Jalpy, bul tetik búgingi kúni bar, zańnamaǵa engizilgen», - dedi ministr.
Onyń aitýynsha, konkýrsqa qatysý úshin talapker nysanaly topqa jatqanymen qatar, Ulttyq biryńǵai testiniń shekti ballyn jinaýy qajet.
«Jalpy, osy grantqa ie bolý úshin úmitkerler eń aldymen jyldaǵydai negizgi 53 785 grantty alýǵa respýblikalyq konkýrsqa 21-31 shilde aralyǵynda qatysyp, baǵyn synaidy. Sol jalpy konkýrs boiynsha grantqa ie bolmaǵan kópbalaly otbasydan shyqqan jáne ataýly kómek alýshylar sanatyndaǵy talapkerler qosymsha berilgen 5 myń grantqa nysanaly granttar alý úshin tamyzdyń 5-10 aralyǵyndaǵy kelesi konkýrsqa tapsyrý úshin jergilikti atqarýshy organdarǵa ótinish bere alady. Bul arada ákimdikter granttardy UBT ballyna jáne grant sanyna qarai taǵaiyndaidy jáne jeńimpazdardyń tizimin jergilikti BAQ-ta jariialaidy. Barlyq nysanaly grant iegerlerine ádettegidei 20 949 teńge kóleminde shákirtaqy taǵaiyndalady. Sonymen qatar, demalys kezinde jylyna 2 ret jol ótemaqysy óteledi», - dedi Ashat Aimaǵambetov.
