QR Eńbek jáne xalyqty áleýmettik qorǵaý ministri Berdibek Saparbaev kópbalaly analar úshin bólek baspana kezegin qurý máselesi jaiynda aitty, dep xabarlaidy QazAqparat tilshisi.
«Altyn alqa» iegerleri jalpy tizimde turmaidy. Qazirgi kezde biz kópbalaly analar úshin bólek bir kezekti qurý máselesin pysyqtap jatyrmyz. Biraq ony birden jasai almaimyz ǵoi. Bárin jan-jaqty qaraý qajet. Qansha qarjy kerek? Qansha baspana salý kerek? Sonyń bárin jan-jaqty qarastyramyz», - dedi B.Saparbaev búgin Astanadaǵy kópbalaly analarmen bolǵan kezdesýde.
Aita keteiik, jiyn barysynda ministr kópbalaly otbasylarǵa beriletin ataýly áleýmettik kómektiń taǵy bir jańalyǵyn jariialady.
«Ataýly áleýmettik kómekke kelsek, Memleket basshysy naqty tapsyrma berdi, buryn januianyń árbir múshesine tabysty eseptegende (kúnkóris minimýmnyń - avt.) 50 paiyzdyń deńgeiinde bolsa, endi ony 70 paiyzǵa kóbeitedi. Eger buryn 14 849 teńge bolsa, 1 sáýirden bastap onyń kólemi 20 789 teńgege kóteriledi. Al endi Astana qalasynda basqa óńirlermen salystyrǵanda orta jalaqy joǵary, sondyqtan 21 698 teńgege deiin kóteriledi. Bizdiń boljamymyz boiynsha osy sharamen, kem degende, 830 myń qazaqstandyq qamtylady. Al Astana qalasynda, kem degende, 6 700-ge jýyq», - deidi B.Saparbaev.
Ministrdiń aitýynsha, kópbalaly otbasynyń múshesi joǵary oqý ornynda oqysa, 21 myń teńgeniń járdemaqysy 23 jasqa deiin tólenedi.
«Osylaisha, osy ýaqytqa deiin januianyń árbir múshesine 4 834 teńge tólenip kelse, 1 sáýirden bastap otbasynyń árbir múshesine 20 789 teńge tólenetin bolady. Al Astana qalasynda - 21 698 teńge. Al otbasydaǵy er kisige jáne áiel kisige burynǵydai 10 500 teńge qosymsha tólenedi», - dep atap kórsetti B.Saparbaev.
