Qazaqstanda doping daýyna ushyrap jatatyn sportshylardyń deni ony bilmei qabyldaýy múmkin. Bul pikirdi QR Mádeniet jáne sport ministrligi sport jáne dene shynyqtyrý komiteti tóraǵasynyń orynbasary Aigúl Bektenova alǵa tartyp otyr, dep habarlaidy QazAqparat.
«Elimizde sport salasynda dopingke múldem tózbeýshilik saiasaty júretinin eske salǵym keledi. 2019 jyly biz dopingpen kúresý maqsatynda arnaiy zań qabyldap, jaýapkershilik qatańdady. Atalǵan zańda 2 normativ bar. Birinshi, ol sportshynyń doping erejesin buzý normativi, ekinshi - doping anyqtalǵan jaǵdaida sportshynyń jarysta kórsetken nátijesi men jetistigin joqqa shyǵarý», - dedi Aigúl Bektenova ortalyq kommýnikatsiialar qyzmeti alańynda ótken baspasóz máslihatynda.
Ministrlik ókiliniń málimdeýinshe, jarysta jeńiske jetken sportshydan doping qoldanǵany anyqtalsa, ol berilgen syi-syiapat pen ataq-dárejeni keri qaitarady.
«Jeńiske jetken sportshyǵa medaldan bólek, chempiondyq titýl, qarjylai jáne múliktei syiaqy beriledi. Eger keiin sportshy doping daýyna ushyrap, ol dáleldense, joǵary atalǵan syi-qurmetti keri qaitarýǵa mindetti. Osylaisha, biz doping daýynyń aldyn alyp otyrmyz. Sonymen qatar elimizde dopingke qarsy ulttyq ortalyq jumys isteidi. Ol jerde sportshylardy dopingke qarsy testileýden ótkizip qana qoimai, sporshylar men jattyqtyrýshylar arasynda onyń aldyn alýǵa qatysty arnaiy dáris, seminarlar ótkiziledi. Sebebi kóptegen sportshy dopingti ádeii emes, bilmegendikten qabyldaýy múmkin. Óitkeni, keibir tyiym salynbaǵan preparattar quramynda dopingtiń elementi bolýy yqtimal», - deidi ol.
