Foto: Aqorda
Qasym-Jomart Toqaev Konstitýtsiialyq komissiia tóraǵasy – Konstitýtsiialyq sot tóraǵasy Elvira Ázimovany, Konstitýtsiialyq komissiia tóraǵasynyń orynbasary – Memlekettik keńesshi Erlan Qarindi jáne Konstitýtsiialyq komissiia múshesi – Prezidenttiń quqyqtyq máseleler jónindegi kómekshisi Erjan Jienbaevty qabyldady, dep habarlaidy Ult.kz.
Memleket basshysyna Komissiianyń jańa Konstitýtsiia jobasy boiynsha atqarǵan jumysy týraly málimet berildi.
Elvira Ázimova Komissiianyń osyǵan deiin ótken on eki otyrysynyń nátijesinde jańa Ata Zańnyń qorytyndy jobasy ázirlengenin baiandady.
Jańa Konstitýtsiia mátini azamattar men sarapshylardyń byltyr qazan aiynan bastap eGov jáne e-Otinish portaldaryna joldaǵan bastamalary negizinde daiyndaldy. Sondai-aq jobada Parlamenttik reforma jónindegi jumys toby qazan-qańtar ailary aralyǵynda jinaqtaǵan tásilder de eskerildi.
Elvira Ázimova Konstitýtsiialyq komissiia talqylaý qorytyndysy boiynsha jańa Konstitýtsiia jobasyn jalpyhalyqtyq referendýmǵa shyǵarýdy usynatynyn jetkizdi.
Memleket basshysy Konstitýtsiialyq komissiianyń óte aýqymdy ári mańyzdy jumys atqarǵanyn atap ótti. Prezidenttiń pikirinshe, jańa Konstitýtsiia erejeleri memleketimizdiń institýtsionaldyq negizin transformatsiialaý úderisi tolyǵymen aiaqtalyp, múlde jańa konstitýtsiialyq úlgige kóshetinin kórsetedi.
Qasym-Jomart Toqaev jańa Ata Zań jobasy qoǵamdaǵy ózekti qundylyqtar men memlekettik saiasat qaǵidattaryn aiqyndap qana qoimai, Qazaqstannyń odan ári progressivti damýyna negiz qalaitynyn aitty.
Prezident mańyzdy jumysty kásibi turǵyda atqarǵan Konstitýtsiialyq komissiia múshelerine rizashylyǵyn bildirdi. Sondai-aq Komissiia músheleriniń jańa Konstitýtsiia jobasyn tikelei efirde talqylaýy qoǵamdyq dialogtiń joǵary deńgeiin tanytqanyna nazar aýdardy.
Budan bólek, Memleket basshysy jobany ázirleý men talqylaýǵa myńdaǵan azamattyń belsene atsalysqanyna toqtalyp, bul «Halyq únine qulaq asatyn memleket» tujyrymdamasyna sai keletinin jáne jańa Konstitýtsiianyń shynaiy halyqtyq sipatyn kórsetetinin atap ótti.
Qasym-Jomart Toqaev taiaý arada jańa Konstitýtsiiany qabyldaý boiynsha respýblikalyq referendým ótkizý týraly Jarlyqqa qol qoiatynyn málimdedi.
