Konstitýtsiialyq Sottyń Prezidenttiń qaita sailanýyna qatysty konstitýtsiialyq normany túsindirýi eldegi saiasi úderisterge bailanysty túrli boljamdarǵa quqyqtyq turǵydan naqty jaýap berdi. Bul týraly saiasattanýshy Qazbek Maigeldinov málimdedi, dep habarlaidy ult.kz.
Sarapshynyń aitýynsha, biliktiń aýysýyna qatysty qoǵamda taraityn túrli joramaldar eldiń saiasi ahýalyna áser etpei qoimaidy. Mundai jaǵdaida ártúrli múddeli toptardyń belsendiligi artyp, saiasi turaqtylyqqa qaýip tóndiretin faktorlar paida bolýy múmkin. Sondyqtan mundai máselelerde quqyqtyq naqtylyqtyń bolýy erekshe mańyzdy.
Qazbek Maigeldinov Konstitýtsiialyq Sottyń búgingi túsindirmesi Prezidenttiń qaita sailaný merzimine qatysty týyndaǵan quqyqtyq máselege túpkilikti jaýap bergenin atap ótti.
«Bul – saiasi elitaǵa joldanǵan naqty belgi. Biraz ýaqyttan beri túrli boljamdarǵa arqaý bolǵan máselege quqyqtyq turǵydan núkte qoiylyp, ártúrli joramaldarǵa toqtaý salyndy», – dedi ol.
Sonymen qatar saiasattanýshy Konstitýtsiialyq Sottyń sheshimi Prezidenttiń avtomatty túrde aldaǵy sailaýdyń kandidaty bolatynyn bildirmeitinin erekshe atap ótti. Onyń sózinshe, sot tek Konstitýtsiiada kózdelgen quqyqtyq normanyń mazmunyn túsindirdi.
«Bul sheshim eshqandai saiasi stsenariidi aldyn ala belgilep qoiǵan joq. Konstitýtsiialyq Sot tek Konstitýtsiiada qarastyrylǵan quqyqtyq múmkindikti túsindirdi. Al memleket basshysyn halyq sailaý arqyly anyqtaidy», – dedi Qazbek Maigeldinov.
Sarapshynyń pikirinshe, qabyldanǵan sheshim eldegi saiasi turaqtylyq pen ishki qoǵamdyq tynyshtyqty saqtaýǵa baǵyttalǵan.
Onyń aitýynsha, Konstitýtsiialyq Sotqa júginýdiń negizgi maqsaty da osy boldy. Bul memlekettik institýttardyń turaqty jumys isteitinin jáne barlyq mańyzdy sheshimderdiń zań aiasynda qabyldanatynyn kórsetedi.
«Bul – ishki saiasi kúshterge berilgen mańyzdy belgi. Qazaqstannyń memlekettik júiesi berik ekenin, barlyq sheshim zań aiasynda qabyldanatynyn kórsetti. Prezident institýtynyń álsireýine nemese saiasi protsesterdi jasandy túrde jedeldetýge jol berilmeidi», – dep túiindedi saiasattanýshy.
