Áleýmettik jelilerde keibir álem ieleri halyq sanyn qysqartyp jatqandyǵy týraly video taratylýda. Belgisiz avtorlar dálel retinde Djordjiia taqtasyndaǵy jazbalarǵa súienedi, dep habarlaidy Stopfake.kz saity.
Video avtorynyń aitýynsha, álem elitasy Jer betindegi halyqty baqylaý jospary týraly 1980 jyly málimdegen. Muny tabiǵatpen tepe-teńdikte bolý úshin planeta halqyn 500 000 000 aspaityn deńgeide ustaý qajettiligi týraly jazylǵan Djordjiia taqtasynan alynǵan dáieksóz dáleldeidi eken. Bul manipýliatsiia.
Djordjiia taqtasy – bul «amerikalyq Stoýnhendj» retinde belgili eskertkish. Ol Djordjiia shtatynda Elbertonda ornatylǵan. Biiktigi 6 metrden asatyn granit plitalardy tabiǵi tasty óńdeitin Elberton Granite Finishing Corporation firmasy shyn esimin aitpai, búrkenshik atyn ǵana kórsetken klienttiń tapsyrysymen jasaǵan. Ol bolashaq urpaqqa habarlama qaldyrmaq bolǵan «shetelde turatyn amerikalyqtardyń shaǵyn tobynyń» atynan áreket etip jatqanyn aitqan. Monýment jalpy salmaǵy 119 tonna bolatyn ortalyq plitany qorshap turǵan tegis emes jiekteri bar tórt alyp tastan turady.
Plitalardaǵy mátin segiz tilde — aǵylshyn, orys, qytai, arab, ivrit, sýahili, hindi jáne ispan tilderinde jazylǵan. Monýmentke tapsyrys bergen belgisiz tulǵany eshkim kórmegen. Postapokaliptikalyq habarlamasy bar tas qurylymynyń ózi jergilikti kórikti orynǵa ainalyp, oǵan qatysty kóptegen túrli teoriialar tarady. Bireýler bul sózder ratsionaldy oilanýǵa itermeleidi dep oilasa, basqalary monýmentke sektanttar tapsyrys bergen deidi. Qastandyq teoriiasyn jaqtaýshylardyń aitýynsha, eskertkish avtory – «álem ieleri». Biraq bul pikir rastalmady, sondyqtan joramal bolyp qaldy.
Aita keteiik, 1650 jyly Dúnie júzi halqynyń sany 500 000 000 adamǵa jetti. Al 1980 jyldary Djordjiia taqtasy ornatylǵan kezde planetada 4,4 milliardtan astam adam bolǵan. Qazirgi kezde bul kórsetkish 8 milliardqa jýyqtady.
Demek, Djordjiia taqtasyndaǵy jazbalar Jer halqynyń sanyn baqylaý jáne azaitý jónindegi belgili bir jospardyń bar ekenin dáleldemeidi.
