Konferentsiia ligasyndaǵy elordalyq «Astana» klýbynyń Finliandiianyń KýPS komandasymen kezdesýin álemniń 120 elinde tamashalaýǵa múmkindik jasaldy. Bul jóninde «Astana» fýtbol klýbynyń bas direktory David Loriia óziniń Instagram-paraqshasynda jazdy, dep habarlaidy "Ult aqparat".
«Sizderge súiinshi habardy jetkizgim keledi. Bizge Konferentsiia ligasy úshinshi irikteý satysyndaǵy «Astana» men KýPS klýbynyń qarymta kezdesýin taratý jóninde mańyzdy kelisim jasaýdyń sáti tústi. Sol arqyly álemniń 120 eliniń jankúierleri atalǵan oiyndy tamashalaýǵa múmkindik alady. Kezdesý «Elarna» jáne «Kazakh TV» telearnalary arqyly tikelei efirde taratylady», - dep jazdy ol.
Aita keterligi, búginde «Kazakh TV» telearnasy Eýropanyń Shyǵys jáne Batys bólikterinde, Ońtústik jáne Ortalyq Amerikada, Avstraliia men muhit aimaǵynda, Soltústik Afrikada, Taiaý Shyǵysta, Aziia men Ońtústik Kavkazda habar taratady.
«Bul otandyq fýtboldy nasihattaý barysynda jasalǵan oń qadam dep sanaimyn. Biz Finliandiiada ótken alǵashqy kezdesýde qolaily nátijege qol jetkizdik. Beisenbi kúni barlyǵymyz bizdiń klýbtyń jeńisine qýanatyn bolamyz», - dep kórsetti ol.
Eske salsaq, elordalyq klýb úshinshi irikteý satysyndaǵy alǵashqy kezdesýde Finliandiianyń KýPS klýbymen 1:1 esebimen teń oinady.
Konferentsiia kýbogynda «Astana» ekinshi irikteý satysynda Grekiianyń «Arisin» (2:0, 1:2) jeńgen bolatyn.
