AQSh prezidenti Djo Baiden Qarjy ministrligindegi basshylyq laýazymǵa usynǵan KSRO týmasy Sáýle Omarova senatta ótken ómiri úshin aqtalyp, kommýnist emes ekenin málimdeýge májbúr boldy, dep habarlaidy Sputnik Qazaqstan portaly RIA Novosti agenttigine silteme jasap.
"Men kommýnist emespin. Adam óz týǵan jerin tańdai almaidy", - dep málimdedi Omarova.
Dál sol tyńdaýda senator-respýblikashyl Djon Kennedi Omarovaǵa "Men sizdi "professor" nemese "joldas" dep ataiyn ba, bilmei turmyn" dedi. Sondai-aq ol Omarovanyń komsomoldan shyǵyp-shyqpaǵanyn surady.
Al senator Pet Tými Omarovanyń akademiialyq jumysyn "bank indýstriiasy úshin sotsialistik manifest" dep atady. Buǵan deiin Tými Omarovadan Máskeý ýniversitetindegi Karl Markstiń kózqarasyna arnalǵan diplomynyń túpnusqasyn talap etken edi, alaida qoljazba sol kúii onyń qolyna timedi.
Taǵy bir respýblikashyl Maik Raýndstyń sózinshe, Omarova óz kózqarasymen búkil indýstriiany "shoshytty".
Qazirgi Qazaqstan jerinde týǵan Omarovanyń ózi týysqandary stalindik rejim kezinde qýǵyn-súrginge ushyraǵanyn málimdedi. Ol bankirlerge óz jumysyn muqiiat oqýǵa keńes berdi.
Al senator-demokrat Elizabet Ýorren Omarovaǵa aitylyp jatqan syndy "qaralaý naýqany" dep atady.
Omarova bedeldi Kornell ýniversitetinde professor bolyp isteidi. Baiden ákimshiligi qyrkúiekte Omarovany Qarjy ministrligindegi qyzmetke usynatynyn málimdegende, kóptegen banktiń lobbisteri ony synai bastady. Buǵan qosa, internette 1995 jylǵy politsiia esebiniń kóshirmesi tarady. Qujatta Omarovanyń sol jyly dúkennen 214 dollardyń taýaryn urlap, ustalǵany aitylǵan.
Omarova Wall Street Journal gazetine erkin naryqty qoldaitynyn, biraq bankterdiń táýekeldi operatsiialardan túsken barlyq túsimdi ózderine qaldyrǵanyn qalamaitynyn málimdedi. Aitýynsha, ol amerikalyq salyq tóleýshilerdi bankterdi saqtandyrýdan qorǵaǵysy keledi.
Omarovanyń ǵylymi maqalalarynda solshyl kózqaras baiqalady, atap aitqanda ol 2020 jyly banktik depozitterdi Federaldy rezervtik júiege aýdarsa qalai bolady degen oi aitty. Sondai-aq ol retteýshi qarjy turaqtylyǵy úshin qaterli dep sanaityn iri bankterdiń kólemin azaitýǵa shaqyrdy.
Sáýle Omarova 1966 jyly Oralda dúniege keldi. Lomonosov atyndaǵy Máskeý memlekettik ýniversitetin támamdady. 1991 jyldan beri AQSh-ta turady. 2021 jyldyń qyrkúieginde prezident Djo Baiden ony AQSh Qarjylyq baqylaý basqarmasynyń basshysy laýazymyna usyndy.
