Almatyda ótken onlain brifing barysynda qalalyq energetikalyq tiimdilik jáne infraqurylymdyq damý basqarmasynyń basshysy Áset Masabaev kommýnaldyq qyzmetterdiń qai túrine ótemaqy jasalatynyn aitty, dep habarlaidy "Ult aqparat".
Onyń aitýynsha, QR Prezidenti janyndaǵy Tótenshe jaǵdaidy qamtamasyz etý jónindegi memlekettik komissiianyń sheshimine sáikes, Indýstriia ministrligi kommýnaldyq qyzmet kórsetýshilerge shyǵyndy óteý erejesin bekitken.
Sol erejege sáikes, ótinish bildirgen tulǵalar jeke derbes shot iesi bolýy shart.
Turǵynnyń áleýmettik mártebesi rastalǵan jaǵdaida energetikalyq tiimdilik basqarmasy aqshany «Alseko» AQ usynǵan derekterge sáikes jetkizýshilerdiń esep aiyrysý shotyna aýdarady. Al olar óz kezeginde esepti kommýnaldyq qyzmetterdiń kólemine proportsionaldy túrde júrgizedi.
«Budan bólek, tutynýshy kommýnaldyq qyzmetterdi tólegen jaǵdaida, sondai-aq kommýnaldyq qyzmetterdi tóleý týraly túbirtekte 15 myń teńgeden kem soma bolsa, kommýnaldyq qyzmetti jetkizýshiler tólemdi kelesi aiǵa qaita esepteidi. Kómek joǵaryda atalǵan sanattarǵa jatatyn, óz atyna kommýnaldyq qyzmet kórsetýshimen jasalǵan kelisimsharty bar jáne karantin engizilgen eldi mekende turatyn adamdarǵa kórsetiledi. Turǵyn úi týraly zańynyń 2-babyna sáikes kommýnaldyq tólemder – sý, jylý, gaz, elektr energiiasy, qoqys shyǵarý jáne lift úshin tólenedi. Basqa qyzmetterge ótemaqy jasalmaidy», - dedi Áset Masabaev.
Munyń aldynda mundai ótemaqyny áleýmettik turǵydan az qamtylǵan 60 myńnan asa almatylyq alatynyn jazǵan bolatynbyz.
