QR Premer-Ministriniń orynbasary Roman Skliar 27 jeltoqsanda apatqa ushyraǵan áýe kemesimen bólek, Bek Air-diń taǵy birneshe ushaǵy arnaiy suiyqtyqpen óńdelmegenin málim etti, dep habarlaidy QazAqparat.
«27 jeltoqsanda saǵat 00.01-den 07.00-ge deiin Almaty áýejaiynda bes áýe kemesi óńdelip, taǵy beseýi óńdelmegen (muzdyń qatýyna qarsy suiyqtyqpen)», - dedi Roman Skliar OKQ-da ótken baspasóz máslihatynda.
Sonymen qatar, onyń aitýynsha, 27 jeltoqsanda Almaty-Atyraý baǵdary boiynsha saǵat tańǵy 05.30-da ushyp shyqqan «Bek Air» áýe kompaniiasynyń ushaǵy da muzdyń qatýyna qarsy suiyqtyqpen óńdelmegen. Komissiia bul máseleni nazarǵa almaq.
Eske sala ketsek, buǵan deiin QR Premer-Ministriniń orynbasary Roman Skliar BekAir ushaǵynyń apatqa ushyraý sebebiniń basty nusqasyn ataǵan bolatyn.
«Áýe kemesin muzdyń basýyna qarsy suiyqtyqpen óńdeý jumysy ishinara júrgizilgen. Áýe kemesi komandiriniń sheshimi boiynsha, tek stabilizatordy óńdeý týraly sheshim qabyldanǵan. Birinshi sanattaǵy muzdyń basýyna qarsy suiyqtyqpen ushaq qanattary da óńdelý tiis», - dedi Roman Skliar.
Eske sala ketsek, 2019 jyldyń 27 jeltoqsanynda Almatydan Nur-Sultan qalasyna ushyp shyqqan Bekeir kompaniiasynyń ushaǵy radardan joǵalyp ketti. Keiin 95 jolaýshysy jáne 5 ekipaj múshesi bar ushaqtyń apatqa ushyraǵany málim boldy. QR Premer-Ministri Asqar Maminniń tóraǵalyǵymen ushaq apatynyń sebepterin tergeý boiynsha Úkimettik komissiianyń otyrysy ótkizilgen edi. Oqiǵanyń mán-jaiyn anyqtaý úshin ushaq qulaǵan aýmaqqa arnaiy komissiia jiberildi.
