Kómir salasyn qadaǵalaýdy basqa vedomstvoǵa ysyryp tastaǵan Energetika ministri Qanat Bozymbaev Premer-Ministrdiń áziline ilik boldy, dep habarlaidy QazAqparat tilshisi.
Búgingi Úkimet otyrysynda Qaraǵandy oblysynyń 6 aidaǵy áleýmettik-ekonomikalyq damýy jaiynda baiandaǵan óńir basshysy Erlan Qoshanov áriptesterine qazirden bastap kómirdi satyp ala berýdi usynǵan bolatyn.
«Byltyrǵy jylǵy jaǵdai qaitalanbas úshin biyl Shubarkól razrezinde kómir jetkilikti. Biz basqa oblystarmen birigip, kestesin jasadyq. Sondyqtan áriptesterime ótinishim, sol keste boiynsha qazirden bastap kómirdi shyǵara bergen durys bolady», - degen edi ol.
Osy oraida Baqytjan Saǵyntaev Energetika ministri Qanat Bozymbaevqa bul máseleni baqylaýǵa alýdy tapsyrǵan edi. Alaida ol osy aidan bastap kómirge qatysty barlyq másele Investitsiialar jáne damý ministrliginiń qaraýyna berilgenin aityp qutyldy.
«Qaiyrbek Aitbaiuly (Investitsiialar jáne damý vitse-ministri), Sizderge ysyryp tastapty ǵoi. «Isker» ministrlikter solai jumys isteidi. Paidasyz nárseni shyǵaryp tastaidy, paidalysyn qaldyrady», - dep ázildedi Premer-Ministr.
