Qazaqstannyń ekologiialyq uiymdary qaýymdastyǵynyń basshysy Aigúl Soloveva balamaly energiia kózderin damytý joldaryn usyndy, dep xabarlaidy QazAqparat tilshisi.
«Búginde balamaly energiia kózderi qymbat degen mif bar. Gaz da tiimsiz deidi. Al kómir nege arzan? Sebebi bizde kómir salasyn jasyryn sýbsidiialaý tetikteri bar. Máselen, kómirdi temirjolmen tasymaldaǵanǵa da sýbsidiia bólip otyrady. Al ondai qosalqy sýbsidiialaý bolmasa, onyń baǵasy gazben birdei bolady», - dedi A.Soloveva Astanada ótken baspasóz máslixatynda.
Onyń oiynsha, qazirgi kezde balamaly energiia kózderi qymbat bolsa da, bolashaqta arzan, tipti tegin túsýi ábden múmkin.
«Máselen, Kaliforniiada ondai energiia kózderi bir jyl boiy tegin boldy deidi. Sondyqtan bizge osy baǵytta jumys istei berý kerek. Sosyn búginde Dúniejúzilik densaýlyq saqtaý uiymynyń standarttaryna tezdetip kóshý kerek. Oǵan sáikes, aýanyń lastanýy adam densaýlyǵyna tigizetin áserimen - pm2, pm01,pm10 dep belgilenedi. Osyny Ekologiialyq kodekske engizgen jón. Áitpese, bizde bir tonnaǵa shaqqandaǵy milligrammen ólshenedi. Negizi, ondai qaldyqtardy adam densaýlyǵyna tigizetin áserimen ólshegen durys», - dep atap kórsetti A.Soloveva.
Aita keteiik, Qazaqstannyń ekologiialyq uiymdarynyń qaýymdastyǵy ekologiialyq problemalar kartasyn jasaýdy josparlap otyr. Uiym basshysynyń orynbasary Eldos Abaqanovtyń aitýynsha, Qazaqstannyń Ekologiialyq kodeksinde qoǵamdyq baqylaý sharalary qarastyrylǵan. Alaida búginde atalǵan sharalar atqarylmaidy.
«Kodekstiń 15-bóliminde qoǵamdyq-ekologiialyq baqylaý quraly bar. Biraq bul jumys istemei otyr. Sol sebepti biz qaýymdastyqtyń negizinde ekologiialyq baqylaý institýtyn qurǵymyz kelip otyr», - dedi E.Abaqanov.
