Qazaqstan Respýblikasynyń Táýelsizdik kúni qarsańynda Kolýmbiia Respýblikasynda Qazaqstannyń tuńǵysh Qurmetti konsýldyǵynyń ashylý rásimi ótti.
Bul týraly QR Syrtqy ister ministrliginiń Telegram kanaly habarlady.
Jergilikti biznesmen, «Croda Oil&Gas Latin America» kompaniiasynyń direktory Omar Valdes taiaý jyldary Qazaqstannyń Qurmetti konsýly qyzmetin júzege asyratyn bolady.
Is-sharaǵa Qazaqstannyń Braziliiadaǵy Elshisi Qairat Sarjanov, Kolýmbiia SIM Eýropa departamentiniń direktory Hýan Kastro, qalanyń qoǵamdyq-saiasi jáne isker toptarynyń, diplomatiialyq korpýs pen media qoǵamdastyqtyń ókilderi qatysty.
Óz sózinde Q. Sarjanov Kolýmbiia Úkimetine Qazaqstannyń Qurmetti konsýldyǵynyń ashylýyna qoldaý kórsetkeni úshin alǵysyn bildirip, Omar Valdeske konsýldyq patentti onlain rejimde tabys etti. Ol Qurmetti konsýldyqtyń ashylýy Nurs-Sultan men Bogota arasyndaǵy ekijaqty kún tártibin, ásirese saýda, investitsiialyq jáne gýmanitarlyq baǵyttarda, onyń ishinde Qazaqstan 2019 jylǵy shildede baqylaýshy mártebesin alǵan Tynyq muhity aliansy sheńberinde keńeitý jónindegi saiasi erik-jigeriniń kórsetkishi bolyp tabylatynyn atap ótti.
Kolýmbiia SIM Eýropa departamentiniń direktory Hýan Kastro Qazaqstannyń Qurmetti konsýldyǵynyń ashylýymen quttyqtady. Bul 2012 jyly ministrlikaralyq saiasi konsýltatsiialar tetigin ornatýdan bastalǵan ekijaqty bailanystardy odan ári damytýǵa yqpal etetin bolady. Kolýmbiialyq diplomat Bogota qalasynda 2019 jylǵy jeltoqsanda ótken Diplomatiialyq jáne qyzmettik pasporttardyń ieleri úshin vizasyz rejim týraly kelisimge qol qoiý jáne ulttyq pasporttardyń ieleri úshin ony ózara qamtamasyz etý jónindegi ýaǵdalastyqqa qol jetkizý arqyly Syrtqy ister ministrleriniń orynbasarlary deńgeiinde konsýltatsiialardyń 4-raýndynyń qorytyndylary boiynsha qol jetkizilgen vizasyz rejimniń mańyzdylyǵyn atap ótti.
Ol Kolýmbiia Úkimetiniń EYDU-ǵa kirý tájiribesimen bólisýge daiyn ekenin atap ótip, kelesi jyly simaralyq konsýltatsiialardyń 5-shi raýndyn ótkizýdi usyndy.
Óz kezeginde, Qazaqstannyń Qurmetti konsýly Omar Valdes Qazaqstan Úkimetine senim bildirgeni úshin alǵys aityp, eki el arasyndaǵy, sonyń ishinde aýyl sharýashylyǵy, taý-ken jáne munai ónerkásibindegi ózara is-qimyldyń áleýetti baǵyttaryn belgiledi. Biznesmen kolýmbiialyq kásipkerlerdi qazaqstandyq seriktestermen iskerlik bailanys ornatý jáne birlesken jobalardy júzege asyrý úshin Qurmetti konsýldyqtyń múmkindikterin paidalanýǵa shaqyrdy.
