Bilim jáne ǵylym ministrligi suranysqa sai kelmeitin 50 mamandyq boiynsha kolledjderge qabyldaýdy toqtatty, dep habarlaidy "Ult aqparat".
Vedomstvo tehnikalyq jáne kásiptik bilim berý (TjKB) mamandyqtary men biliktilikteriniń jańa synyptaýyshyn ázirlep, bekitti. Ózgerister kolledjderde oqytylatyn mamandyqtar eńbek naryǵynyń qazirgi suranystaryna sáikes kelýi úshin jasalǵan.
Endigi kezekte oqý protsesine suranysqa ie mamandyqtar boiynsha jańa bilim berý baǵdarlamalary engizilip jatyr.
Máselen, qazaqstandyq kolledjderde synama irikteýshi, sham jasaýshy, gýverner, zańger-konsýlt jáne taǵy basqa mamandyqtar boiynsha qabyldaý toqtatyldy.
Sondai-aq jikteýshiden «Bilim berý uiymynyń zerthanashysy», «Patenttaný» jáne basqa da mamandyqtar alynyp tastaldy.
«Bizdiń basty maqsatymyz – bilim berý baǵdarlamalary men oqytylatyn mamandyqtardy jumys berýshilerdiń zamanaýi suranystaryna sáikestendirý bolyp tabylady. Sondyqtan biz úlken taldaý jumystaryn júrgizip, eńbek naryǵyna monitoring júrgizdik. Jumys berýshilermen jáne salalyq qaýymdastyqtardyń ókilderimen kezdestik. Olardyń usynystaryn eskere otyryp, mamandyqtar jikteýishisin jańarttyq. Endi qazaqstandyq kolledjderde «Robototehnika jáne endirilgen júieler», «Nanomaterialdar negizindegi buiymdar tehnologiiasy», «Óndiristiń additivti tehnologiialary», «Qashyqtan basqarylatyn aviatsiialyq júie», «Ǵimarattardy jobalaý men paidalanýdyń avtomattandyrylǵan júieleri», «Jylyjai sharýashylyǵyn uiymdastyrý», «Grafikalyq jáne mýltimediialyq dizain», «Tas óńdeý óndirisi», «Landshaftyq dizain», «Jyljymaityn múlikti basqarý», «Destinatsiiany basqarý», «Qurylystaǵy smetalyq is», «Eńbekti qorǵaý jáne tehnologiialyq protsesterdiń qaýipsizdigi» jáne basqa da jańa mamandyqtar oqytylady», – dep atap ótti QR BǴM Tehnikalyq jáne kásiptik bilim berý departamentiniń direktory Nasymjan Ospanova.
