QR Premer-Ministriniń orynbasary Berdibek Saparbaev bastaǵan úkimettik jumys toby Shymkent qalasyna bardy. Onyń quramynda QR eńbek jáne halyqty áleýmettik qorǵaý ministri Birjan Nurymbetov, QR densaýlyq saqtaý ministri Eljan Birtanov, QR bilim jáne ǵylym ministri Ashat Aimaǵambetov, QR mádeniet jáne sport vitse-ministri Órken Bisaqaev, QR aqparat jáne qoǵamdyq damý vitse-ministri Daniiar Esin boldy.
Sapardyń negizgi maqsaty — Memleket basshysynyń Qazaqstan halqyna arnaǵan Joldaýynyń basym baǵyttaryn túsindirý.
Úkimet músheleriniń jumys sapary №65 orta mektepke barýdan bastaldy, onda pedagogtar qaýymdastyǵymen, ardagerlermen jáne bilim berý salasynyń qyzmetkerlerimen kezdesý ótti.
Kezdesý barysynda bilim berý sapasyn arttyrý, materialdyq-tehnikalyq bazany jaqsartý, pedagogtardyń mártebesin jáne materialdyq qamtamasyz etýdi arttyrý jáne basqa da ózekti máseleler talqylandy.
Óz sózinde vitse-premer el basshylyǵy áleýmettik salany damytýǵa eleýli qoldaý kórsetip jatqanyn atap ótti.
«Biz bilimdi jastar býynyn tárbieleýimiz kerek. Elbasy men Memleket basshysy buǵan erekshe kóńil bóledi. "Pedagog mártebesi týraly" zań jobasy Parlamenttiń qaraýynda. Muǵalimderdiń quqyqtary qorǵalady», — dedi ol.
Vitse-premer jastardy rýhani-ónegelik tárbieleýdi kúsheitýdiń, olardy mektepten tys ispen shuǵyldanýǵa tartýdyń qajettiligine toqtaldy.
«Bizde jastar arasynda quqyq buzýshylyqtar men ózine-ózi qol jumsaý faktileri nelikten artyp keledi? Sebebi, balalar mektepten keiin esh nársemen shuǵyldanbaidy. Ata-analary jumysta bolǵan kezde, bala óz betimen qalady. Balalar túrli úiirmeler men sektsiialarǵa baryp, sportpen shuǵyldanyp, ónermen ainalysýy qajet. Bizde áleýmettik nysandar jetkilikti túrde salynǵan, olarǵa keshki ýaqytta ári demalys kúnderi jastardyń barýyn barynsha qamtamasyz etý qajet. Biz tiisti jumystardy júrgizip jatyrmyz. Sonda bizdiń balalarymyz tárbieli, denderi saý bolyp, quqyq buzýshylyqtarǵa barmaidy», — dedi B. Saparbaev.
Sondai-aq, vitse-premer kolledjderdiń jumysyn synǵa aldy.
«Kolledjderde jyl saiyn myńdaǵan túlekter shyǵady, olar josparly túrde jumyssyzdar qataryn tolyqtyrady deýge bolady. Sebebi kolledjderdiń basshylyǵy kimdi ári qalai oqytyp jatqandaryn qadaǵalamaidy. Birneshe jyl buryn biz ár túlektiń jumysqa ornalasýy zeinetaqy jarnalary týraly anyqtamamen rastalatyn tájiribeni engizdik, biraq budan da shyǵýdyń jolyn tapty. Bir-eki aiǵa jumysqa turady, aýdarymdar túsken soń, qaǵaz alyp keldi jáne sonymen máseleni jaýyp qoiady. Sebebi kolledjder suranysy joq mamandyqtarǵa oqytady jáne bilim berý sapasy tómen. Sondyqtan bizde barlyq jerde kadr tapshylyǵy bar», — dedi B. Saparbaev.
Budan ózge, vitse-premer Shymkent ákimdiginde áleýmettik-eńbek salasy máseleleri jáne mindetti áleýmettik meditsinalyq saqtandyrýdy engizý boiynsha keńes ótkizdi.
