Bilim jáne ǵylym ministri Ashat Aimaǵambetov bilim berý máseleleri boiynsha zańnama tehnikalyq jáne kásiptik bilim berý deńgeiin qalai qamtyǵanyn aityp berdi, dep habarlaidy "Ult aqparat".
Ministr Facebook paraqshasynda zańǵa engizilgen ózgeristerge sai, tehnikalyq jáne kásiptik bilim berý júiesine mynadai tártip engizilgenin jazdy.
1. Endi stýdentterdiń dýaldy júiesi arqyly bilim alǵan merzimi eńbek ótili retinde esepteledi. Bul kolledj túlekteriniń jumysqa aitarlyqtai tájiribemen ornalasý múmkindigin arttyrady.
2. Bekitilgen zańnamaǵa sáikes ýákiletti organnyń kolledjderde oqý merzimderin belgileýi týraly norma alynyp tastaldy. Buǵan deiin biz ár biliktilikter boiynsha bilim alý merzimderin qatań bekitetinbiz. Ortasha eseppen alǵanda, oqý merzimi 2 jyldan 3 jyl 10 aiǵa deiin jalǵasatyn. Endi oqý uzaqtyǵy naqty bilim berý baǵdarlamasyna jáne qajetti oqý nátijelerine bailanysty bolady. Jańa ózgeristerge sáikes kolledjder jumys berýshilermen kelise otyryp, kásiptik standarttar nemese naryq talaptary negizinde bilim berý baǵdarlamalaryn ázirleidi. Keiin ony QR BǴM baǵdarlamalarynyń tizilimine qosyp, soǵan bailanysty kadrlar daiyndaidy.
3. Kolledj ókilderi kótergen taǵy bir másele sheshimin tapty. Endi kolledjder aqyly negizde qyzmet kórsetip, oqý-óndiristik sheberhanalarda, sharýashylyqtarda, oqý poligondarynda daiyndaǵan taýarlaryn sata alady. Máselen, «Dánekerleý isi» mamandyǵy boiynsha oqityn stýdentter praktika kezinde temirden sapaly konstrýktsiialar jasaidy, jas konditerler keremet ónimder pisiredi, qolóner baǵytyndaǵy mamandyqtary boiynsha oqityn stýdentter kiizden, keramikadan, aǵashtan, bylǵarydan, zergerlik buiymdardan avtorlyq buiymdar daiyndaidy. Biraq onyń bárin sata almaityn.
4. Qazirgi ýaqytta joǵary oqý oryndaryna qarasty biraz kolledjder jumys isteidi, biraq qoldanystaǵy zańnamaǵa sáikes ol oqý oryndary biýdjet esebinen kadrlardy daiarlaý úshin memlekettik tapsyrys ala almaidy. Jańa túzetýlerge sáikes bul másele oń sheshimin tapty.
5. Memlekettik tapsyrysty alý úshin kolledjderdiń akkreditteýden ótýine qatysty talaptar alynyp tastaldy.
«Tehnikalyq jáne kásiptik bilim berý (TjKB) júiesi bolashaq mamandardy neǵurlym ikemdi, beiimdelgish, tiimdi etip jáne jumys oryndarynda talap etiletin quzyretterdi barynsha úiretýge daǵdylanýy tiis», - deidi Ashat Aimaǵambetov.
