© Sputnik / Ekaterina Shtýkina
Soltústik Qazaqstan oblysynyń etika jónindegi keńesi kólikti qujatsyz jáne mas kúiinde aidaǵan aýyl ákimin qyzmetinen bosatýǵa usynys engizdi, dep habarlaidy Sputnik Qazaqstan.
Keńes múshesi Inessa Qýanovanyń aitýynsha, otyrysta Shal aqyn aýdanyndaǵy Iýbileinyi aýyldyq okrýgynyń ákimi Búrkit Shekenovtyń tártiptik isi qaraldy. Sheneýnik Astana qalasyndaǵy issapardan kelgennen keiin bir dámhanaǵa keshki asqa barǵan. Sol jerde ishimdik iship, artynan qyzmettik kólikke otyrady.
Sóitip, 10 qarasha kúni mas kúiinde Sergeevka qalasynyń bir kóshesimen júrip kele jatqanda politseiler toqtatqan. Sottyń úkimimen ákim 20 táýlik boiy ákimshilik qamaqta otyryp shyqty.
"Ákim memlekettik qyzmet isteri deparatmentiniń ókilderine aýyl sharýashylyǵy jármeńkesinen keiin issapardan kele jatqanda birge bolǵan bal satýshysy joldyń boiyndaǵy dámhanaǵa shaqyrǵanyn aitty. Sonda ekeýi keshki aspen "medovýha" ishken. Al sot qaýlysynda bir banka syra týraly jazylǵan. Qalai bolsa da, sonyń ózi meditsinalyq tekseris kezinde jeńil dárejede mas bolǵanyn anyqtaýǵa jetip turdy", - deidi Qýanova.
Oǵan qosa, Shekenovke júrgizýshi kýáligi berilmegeni anyqtaldy. Ony ishki ister ministrliginiń bazasy da rastap otyr.
"Ákim ózi kinásin tolyǵymen moiyndady. Biraq túngi birde mas kúiinde kóshege qalai shyqqanyn túsindire almady. Osy áreketimen jol qozǵalysy men ainaladaǵy adamdarǵa qaýip tóndirgen", - dep atap kórsetti Qýanova.
Keńestiń sheshimine sáikes, ákim birqatar shekteýler men erejelerdi buzdy. Etikalyq kodeks pen zańǵa da qaraǵan joq. Sol sebepti elge syily jáne zańǵa baǵynatyn basshy bola almaidy. Keńes ony qyzmetinen bosatýǵa usynys engizdi.
