QR Bas kólik prokýrorynyń mindetin atqarýshy Jasulan Elamanov temirjol biletterin satýǵa arnalǵan Mobius júiesin synǵa aldy, dep habarlaidy QazAqparat.
Jasulan Elamanov áýeli «Nurly jol» baǵdarlamasynyń qarjysyn igerý boiynsha keshendi tekserý bastalǵanyn málim etti.
«Tekserýler kóliktik baqylaý organdarynyń jumysynda eleýli kemshilikter bar ekenin anyqtady. Ótken jyly ákimshilik jaýapkershilikten jaltarý, arnaiy ruqsattardy zańsyz jolmen berý, májbúrli tyiym sharalaryn qoldanbaý siiaqty kemshilikter anyqtalǵan bolatyn. QR Indýstriia jáne infraqurylymdyq damý ministrligine tiisti usynymdar bergenbiz. Sol usynymdar boiynsha Kólik komitetine qarasty aýmaqtyq bólimshelerdiń 14 qyzmetkeri ákimshilik jaýapqa tartyldy. Al sybailas jemqorlyqqa qarsy is-qimyl qyzmetiniń ókilderi birneshe laýazymdy tulǵany para alǵany úshin ustady», - degen kólik prokýratýrasynyń ókili «QazAvtojol» ulttyq kompaniiasynyń jumysynda zańbuzýshylyqtar anyqtalǵanyn atady.
«Kóliktik baqylaý qyzmetine saýal kóp. 2015 jyldan beri «Nurly jol» baǵdarlamasy boiynsha 51 joba júzege asyrylǵan. Olar 1700 shaqyrym avtomobil jolyn salyp jóndeýge baǵyttalǵan jobalar bolatyn. Jalpy somasy 700 mlrd teńgege taiaý. Qazir ýákiletti organdarmen birge sol qarjynyń qanshalyqty zańdy igerilgenin tekserip jatyrmyz. Ázirdiń ózinde «QazAvtojol» ulttyq kompaniiasy men onyń aýmaqtyq bólimsheleriniń qyzmetinde óte kúrdeli zańbuzýshylyqtar anyqtalyp jatyr», - dedi ol.
Jasulan Elamanov temirjol biletiniń saýdasyn retteý úshin iske qosylǵan Mobius júiesiniń jumysyn synǵa aldy.
«Bul júie bilet alyp satqyshtardyń jolyn kesýi tiis bolǵan. Qazir olai bolmaǵanyn kórip otyrmyz. Biletti alyp-satý áli jalǵasýda. Oǵan BAQ-taǵy materialdar dálel. Sonyń biri boiynsha tekserý júrgizip, Shymkent qalasyndaǵy vokzaldardan bir kúnniń ishinde biletti zańsyz satyp júrgen 6 adamdy ustadyq. Olardyń bári ákimshilik quqyq buzý kodeksiniń 449-baby boiynsha jaýapqa tartyldy. Dál oyndai jaǵdai Almaty qalasynyń vokzaldarynda da oryn alyp otyr. Bul mysaldar Mobius júiesin ainalyp ótýge bolatynyn kórsetedi. Bul másele áli joiylmaǵandyqtan, ózge de jaýapty organdarmen birge shara qoldanamyz», - dedi QR Bas kólik prokýrorynyń mindetin atqarýshy.
