Kólik politseileri temir jolda belgilenbegen jerlerden ótkeni úshin 20 myńnan astam adamdy ákimshilik jaýapqa tartty, dep habarlaidy "Ult aqparat".
Bul týraly Kóliktegi politsiia departamentiniń baspasóz qyzmeti málim etti.
«Kólik politseileri aǵymdaǵy jyldyń basynan beri temir jol boiynda adamdar men úi janýarlarynyń bolýyna bailanysty poiyzdardyń shuǵyl tejeýiniń aldyn alý maqsatynda halyqpen 572 kezdesý jáne 968 keshendi reidtik is-sharalar ótkizdi», - dedi QR IIM Kóliktegi politsiia departamentiniń Ákimshilik politsiia basqarmasynyń bastyǵy Jasulan Baikenov.
J. Baikenovtyń aitýynsha, aǵymdaǵy jyl basynan beri temir jol tóseminiń belgilenbegen jerlerinen ótkeni úshin 20 072 azamat ákimshilik jaýapqa tartylǵan.
Osy ýaqyt ishinde poezdarda 1723 shuǵyl tejeý faktisi tirkeldi, onyń ishinde 479-y adamdardyń, 1172-si maldyń bolýyna bailanysty. Sondai-aq, temir joldarǵa bógde zattardy qoiý boiynsha 572 fakti tirkelgen.
Máselen, Qyzylorda stantsiiasynyń Jelilik politsiia bólimine «Qyzylorda–Nur-Sultan» baǵytyndaǵy jolaýshylar poiyzynyń teplovoz mashinisi adam soǵýdyń aldyn alý maqsatynda jedel tejeýdi qoldanǵany týraly habarlama kelip tústi.
Tekserý barysynda Jambyl oblysynyń 38 jastaǵy turǵyny anyqtalyp, ustaldy. Ol júrip bara jatqan poezdyń aldyna shyǵyp, ony toqtatpaq bolǵan.
Meditsinalyq kýálandyrý nátijesi quqyqbuzýshynyń orta dárejeli mas kúide bolǵandyǵyn rastady.
Ustalǵan azamatqa qatysty QR ÁQBtK-niń 559-baby 5-tarmaǵy, iaǵni, belgilenbegen jerlerde temir jol arqyly ótý jáne 440 baptyń 1-tarmaǵy, iaǵni, qoǵamdyq oryndarǵa masań kúide kelý boiynsha eki ákimshilik hattama toltyryldy. Nátijesinde oǵan 5 AEK ( 12 625 tenge) kóleminde aiyppul salyndy.
Joǵaryda kórsetilgen poezdyń toqtaý ýaqyty 2 minýtqa sozyldy.
«Kólik politseileri temir jol kóligi nysandarynda qaýipsizdik erejelerin saqtaý jáne temir joldan tek arnaiy belgilengen jerlerden ǵana ótý qajettigin taǵy da eske salady. Ásirese, ata-analar men balalar temir jol - asa qaýipti aimaq ekendigin esten shyǵarmaýlary tiis», dedi Jasulan Baikenov.
