Kólik politseileri jolaýshylardyń jalpy somasy 6 mln teńgeden asatyn, abaisyzda joǵaltqan aqshalaryn taýyp, iesine qaitardy, dep habarlaidy "Ult aqparat".
Biylǵy jyldyń 7 jeltoqsanynda Q.Nuraly esimdi azamat «Almaty–Nur-Sultan» baǵytymen ushý úshin Almaty qalasynyń áýejaiynda tekserýden ótken bolatyn. Onyń syrt kiiminiń ishki qaltasynda 740 000 teńge jáne 1 600 AQSh dollar somasynda aqsha qarajaty bolǵan.
Q.Nuraly aqshasynyń joǵalǵandyǵyn áýe kemesiniń bortynda otyrǵanda biraq bilgen. Elorda áýejaiyna ushyp kelgen soń, ol birden Nur-sultan qalasy áýejaiyndaǵy Jelilik politsiia bólimine iri kólemdegi aqshasynyń joǵalǵany týraly ótinish bildirdi. JPb qyzmetkerleri bul týraly dereý Almaty qalasyndaǵy áriptesterine habarlady.
Almaty qalasy áýejaiyndaǵy kólik politseileri jedel-izdestirý is-sharasyn júrgizip, nátijesinde ushý aldyndaǵy tekserý pýnktiniń janynan joǵalǵan aqshany taýyp aldy. Aqsha zańdy iesine qaitaryldy.
Óz kezeginde elorda turǵyny Q.Nuraly joǵalǵan aqshasyn ózine qaitarǵan politseilerge alǵysyn bildirdi.
Kóliktegi Politsiia departamentiniń basshylyǵy qyzmettik mindetterin úzdik atqarǵan politseilerdi marapattaýdy josparlap otyr.
Esterińizge sala keteiik, aǵymdaǵy jyldyń 27 qarashasy men 2 jeltoqsanynda kólik politseileri Resei Federatsiiasynyń azamaty M.Sýhomlinovqa jáne Jýlanovtar otbasyna joǵalǵan qujattaryn jáne 5 mln teńgeden astam aqsha qarajattaryn taýyp, qaitaryp bergen bolatyn.
