QR Eńbek jáne xalyqty áleýmettik qorǵaý vitse-ministri Svetlana Jaqypova jýrnalisterdiń aldyna shyǵyp, zeinetaqy tólemderin aýdarý tártibin túsindirdi. Buǵan deiin ol áleýmettik jeliler arqyly bailanysqa shyqqan bolatyn, dep xabarlaidy QazAqparat tilshisi.
«Atalǵan másele meniń quziretime jatady. Ózim eńbek demalysynda boldym. Senbi kúni birden bailanysqa shyǵa almadym. Sondyqtan jeksenbi kúni Feisbýk arqyly túsinikteme berýge tyrystym», - dedi S.Jaqypova Úkimet úiinde ótken baspasóz máslixatynda.
Onyń aitýynsha, zań jobasy byltyrdan beri ázirlendi. Tártip boiynsha qoǵamdyq talqylaýǵa da salyndy. Oǵan kásipkerler, sarapshylar men quziretti memlekettik organdardyń ókilderi qatysty. Parlament depýtattary da qarady.
«Negizi, «azamattyq-quqyqtyq kelisimsharttar» dep alǵanda, biz jumystar men qyzmetterdi tolyǵymen qamtýdy kózdedik. Sol sebepti dál sondai anyqtamany aldyq. Máselen, aqyly qyzmet kórsetý kelisimsharty bar. Tasymal salasynda qyzmet kórsetý, konsaltingtik jáne marketingtik qyzmetter jáne taǵy basqa kelisimsharttar bolady. Ondai kelisimsharttardyń sany 30-dan asady. Biz onyń bárin «azamattyq-quqyqtyq kelisimsharttar» dep aldyq. Al zeinetaqy jarnasyn ustaý tártibi men merzimi Úkimet qaýlysymen retteledi. Atalǵan másele zańda da kórsetilgen. Sondyqtan zańda kelisimsharttardyń naqty ataýlaryn táptishtep jazýdyń qajeti joq», - dep atap kórsetti S.Jaqypova.
Osy oraida vitse-ministr negizsiz dálelderge senbeýge keńes berdi.
"Qazir áleýmettik jelilerdi qarasam, "kólik pen páter satýdan zeinetaqy jarnasyn ustaidy" dep jazyp jatyr. Olai emes. Ondai tabystan zeinetaqy jarnalary ustalmaidy. Sizder jumys jasaý, ia bolmasa, qyzmet kórsetý arqyly tabys tapsańyz ǵana zeinetaqy jarnasy ustalady. Ókinishke qarai, qazir jumys berýshiler ondai kelisimsharttardy jasaidy da, zeinetaqy jarnalaryn tólemei júredi. Jumysshylar bolsa, ony talap etpeidi" , - dedi S.Jaqypova.
Aita keteiik, buǵan deiin Svetlana Qabykenqyzy áleýmettik jeliler arqyly bailanysqa shyqqan bolatyn.
«Barlyq zeinetaqy aýdarymdary azamattardyń tapqan tabystarynan ǵana tólenedi. Máselen, kásiporyn jumysshylary úshin tapqan tabysy onyń jalaqysy, jeke kásipker úshin - bul tikelei kásipkerlik qyzmetten alynǵan kiris, jeke notariýstar úshin - bul olar kórsetken qyzmetten túsken tabys sanalady. Al ótemaqyly shart (azamattyq-quqyqtyq shart dep atalady) negizinde zańdy nemese jeke tulǵa úshin jumystardyń nemese qyzmetterdiń belgili bir túrin oryndaityn azamattar úshin mindetti zeinetaqy jarnasy atalǵan jumystardy nemese qyzmetterdi (jeke múlkin satýdan emes) oryndaý nátijesinde alynatyn kirister tólenedi», - dep jazdy vitse-ministr Feisbýktegi paraqshasynda.
