Foto: Aqorda
Prezident Qasym-Jomart Toqaevtyń tóraǵalyǵymen Qazaqstan Respýblikasy Qaýipsizdik Keńesiniń kólik-logistika salasyn damytý máseleleri jónindegi otyrysy ótti, dep habarlaidy Ult.kz.
Kólik ministri Marat Qarabaevtyń jáne birqatar ortalyq memlekettik organdar basshylarynyń baiandamalary tyńdaldy.
Memleket basshysy kólik salasyndaǵy ahýaldy synǵa aldy. Qordalanǵan problemalar men belgilengen mejelerdiń oryndalmaýy jańǵyrtý jumystaryn júrgizýge kedergi keltirip otyr. Prezident shekaradan júk ótkizýdiń qiyndyǵyn, kóptegen ótkizý beketteriniń jaǵdaiy nashar ekenin, sondai-aq iri infraqurylymdyq-tranzittik jobalardyń óz ýaqytynan keshigip jatqanyn aitty.
Qasym-Jomart Toqaev «Jasyl dáliz» júiesin uiymdastyryp, elimizdiń logistikalyq áleýetin ońtaily paidalanýdyń mańyzyna toqtaldy. Onyń aitýynsha, jahandyq syn-qaterler kúsheigen kezeńde Qazaqstan óziniń básekelestik artyqshylyǵyn saqtap qana qoimai, ony nyǵaita túsýge tiis.
Memleket basshysy júk tasymaly kólemin arttyrý úshin naryqty aviaotynmen jetkilikti deńgeide qamtamasyz etý qajet dep sanaidy. Budan bólek, mýltiplikativtik tiimdilikti kóterý maqsatynda elimiz arqyly ótetin júk tasymaly kólemin ulǵaitý, sonyń ishinde álemdik jetkizý tizbegine qosylý mindeti qoiyldy.
Jiyn sońynda Prezident ministr Marat Qarabaevqa jumys barysynda jibergen kemshilikteri úshin sógis jariialady. Memleket basshysy kólik-logistika salasyndaǵy problemalardy sheshýge qatysty naqty sharalar qabyldaýdy tapsyrdy.
