Memleket basshysy Nur-Sultan qalasynyń ákimi Altai Kólginovti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa birinshi jartyjyldyqtyń qorytyndysy boiynsha elordanyń áleýmettik-ekonomikalyq jáne infraqurylymdyq damýy týraly aqparat berildi.
Prezidentke kezekte turǵan azamattar úshin qoljetimdi turǵyn úi qurylysyn ulǵaitý, jańa mektepter salý arqyly úsh aýysymdy oqý problemasyn sheshý, avtomobil kópirleri men joldar salý, úlestik qurylys nysandaryn aiaqtaý, gaz tartý máselesi, turǵyn-úi alaptaryn damytý, jeke investitsiialar tartý jóninde baiandaldy.
Altai Kólginov sorǵy-súzý stantsiiasynyń (SSS-3) qurylysy týraly aqparat berdi. Qazir qala táýligine 300 myń tekshe metr sý tutynady, al SSS-3 iske qosylsa táýligine 100 myń tekshe metrden astam qosymsha sý beredi.
Qala ákiminiń aitýynsha, jylýmen jabdyqtaý qýatyn arttyrý úshin JEO-3 qurylysy, gaz qazandyqtaryn jobalaý jumysy júrip jatyr. Gaz qazandyqtary iske qosylǵanda JEO-3 qýaty 3 eseden de asatyn bolady. Bul qurylysy júrip jatqan bolashaq aýdandardy jylýmen qamtýǵa múmkindik beredi. Sonymen qatar káriz tazartý qurylystaryn jobalaý (KTQ-2), injenerlik jelilerdi jańǵyrtý, qosalqy elektr stantsiialaryn jańalaý jumystary júrip jatyr.
Prezidentke qalany abattandyrý boiynsha júrgizilip jatqan jumystar týraly málimet berildi. Biyl elordada taǵy 200-den asa aýla men qoǵamdyq demalys oryndary jańartylady.
Memleket basshysy jalpy ákimdik júrgizip jatqan jumystardy qoldady. Altai Kólginovke elordanyń infraqurylymyn damytyp, abattandyrý jumystaryn jalǵastyrýdy, qala turǵyndarynyń túitkildi máselelerin sheshýdi tapsyrdy.
