Nur-Sultan qalasy ákimshilik baǵyttan iskerlik jáne týrizm ortalyǵyna ainalyp keledi. Bul týraly elorda ákimi Altai Kólginov Búkilálemdik týristik uiymnyń (UNWTO) VIII jahandyq sammitinde aitty, dep habarlaidy QazAqparat.
«Álemdik deńgeidegi mundai iri shara Ortalyq Aziiada alǵash ret uiymdastyrylyp otyr. Biz úshin – bul úlken mártebe. Ótken jyldary bul sammit Seýl qalasynda, Kýala-Lýmpýrde, Ystanbulda jáne Barselonada ótken bolatyn. Jalpy, elordamyzdyń qalyptasýy men damýy Elbasymen tyǵyz bailanysty. 21 jylda elordanyń aýmaǵy úsh esege artty. Halyq sany kezinde 280 myń bolsa, qazir 1 millionnan asyp tústi. Nur-Sultan jastar qalasy bolyp sanalady. Munda halyqtyń 700 myńǵa jýyǵy – 35 jasqa deiingi jastar. Sonymen birge, elordamyz ákimshilik qaladan iskerlik jáne týrizm ortalyǵyna ainalyp keledi», - dedi A. Kólginov samitte.
Qala basshysynyń aitýynsha, bul sammit elordanyń ǵana emes, álem qalalarynyń jahandyq damýyndaǵy mańyzdy shara bolmaq.
«Adamzattyń bolashaǵy qalalarmen tyǵyz bailanysty. Jahandaný – jappai týrizmdegi kedergilerdi joiýdyń basty quraly. Týristerdi kóptep tartý úshin qala jaily ári qaýipsiz bolýy tiis. Qazir osy baǵytta jumys istep jatyrmyz jáne turǵyndardyń kúndelikti ómirin jailylyqpen qamtamasyz etýdemiz. Eýropa qalalarynyń úzdik tájiribesin aldyq, qaýipsizdik, logistika, densaýlyq saqtaý, bilim berý, TKSh standarttaryna negizdelgen «aqyldy qala» tujyrymdamasyn ázirlep jatyrmyz», - dedi ákim.
Aita keteiik, elordada Búkilálemdik týristik uiymnyń (UNWTO) qala týrizmine qatysty VIII jahandyq sammiti bastaldy. Onda aqyldy qalalardy damytý arqyly qalanyń ózekti máselelerin sheshý, qalany basqarý, turaqty damý, innovatsiialar men tehnologiialar taqyryptary talqylanbaq.
Shara barysynda QR Úkimetiniń basshysy Asqar Mamin Nur-Sultan qalasyn álemniń TOP-50 tartymdy týristik baǵytyna engizý kózdelip otyrǵanyn atap ótti.
