Nur-Sultan qalasynyń ákimi Altai Kólginov Nur-Sultan ataýyn Astana dep ózgertý týraly aitty, - dep habarlaidy Tengrinews.kz.
Ákimniń aitýynsha, biyl elorda ataýyn ózgertýge ketetin shyǵyn 2019 jylmen salystyrǵanda áldeqaida az bolady.
"2019 jyldyń biýdjetin qaradyq, qala ataýy ózgergen kezde, qaǵaz júzinde kóp protsess boldy. Qazir kópshiligi, is júzinde barlyq qujat onlain rejiminde júrgiziledi, sondyqtan shyǵyndar áldeqaida az bolady. 2019 jyly eseptedik – shamamen 30 million teńge. Bul - mańdaishalar, blankter. Qazir məslihat osyndai sheshim qabyldasa, bərin bir kúnde ózgertkeli jatqan joqpyz", - dep jaýap berdi Kólginov Beibitshilik pen kelisim saiabaǵynda ótken aǵash otyrǵyzý saltanatynda.
Jýrnalister ákimnen qalaǵa burynǵy ataýynyń qaitarylýyna bailanysty qandai sezimde ekenin surady.
"Qala tarihyna úńilý kerek. Qalamyz Tselinograd, Aqmola, Astana, Nur-Sultan dep ataldy, qazir ataýy qaita ózgertilip jatyr. Árbir tarihi kezeńge qurmetpen qaraý kerek dep oilaimyn. Bireý Tselinogradta, bireý Aqmolada týyp ósti. Mysaly, meniń balalarym Astanada dúniege keldi, qazir men Nur-Sultan qalasynyń ákimimin, sondyqtan ár kezeńge úlken qurmetpen qaraý kerek. Biz úshin eń bastysy - qoǵamnyń pikiri. Usynys aityldy, qazir bári muny talqylap, rásimder júrgizilip jatyr", - dep jaýap berdi Altai Kólginov.
