Elordalyq júk tasymaldaýshylar qaýymdastyǵynyń basshysy Aslan Kemelbaiuly júk mashinalaryna ruqsat etilgen júkteme kólemin arttyrýdy usyndy, dep habarlaidy QazAqparat.
«Júk tasymaly salasynda 1993 jyldan beri sheshilmei kele jatqan máseleler bar. 1993 jyly kólik inspektsiiasy quryldy, keiinirek bul inspektsiia túrli ministrlikterge berildi, biraq problemalar sol kúiinde qaldy. Qazir Qazaqstan bizdiń joldarymyzda júk mashinalaryna 10 tonna júkke ruqsat berip otyr. Biraq bul – bir oske (dóńgelek) berilgen júkteme, eger qos dóńgelekti, ádettegidei tirkemesi bar júk kóligin alsaq, onda bir oske 8 tonna alamyz, 8 + 8 – 16 tonna shyǵady. Nátijesinde, bir samosval óz salmaǵyn eskere otyryp, 26 tonna júk tasymaldai alady. Is júzinde, bul samosval 30 tonna júk tasi alady. Kóliktiń óz salmaǵy 15 tonna, oǵan 30 tonna qossaq, 45 tonna shyǵady. Eger 45 tonnany úsh oske bólsek, onda bir oske 15 tonnadan keledi», - dedi Aslan Kemelbaiuly elordalyq kásipkerler palatasynda kólik biznes ókilderimen kezdesýde.
Sonymen birge, qaýymdastyq ókili EAEO elderine: Reseide, Belarýste jáne Armeniiada bir oske 11,5 tonna tasymaldaýǵa ruqsat etilgenin, bul júk tasymalynyń biznes qurylymyn jetildirý úshin jaqsy kórsetkish ekenin atap ótti.
«2006 jyldan bastap Qazaqstan bir oske 13 tonna dep eseptep, jol sala bastady. Ókinishke orai, byltyr 24 shildede bólinbeitin júkti tasymaldaýshylardyń budan bylai arnaiy ruqsat ala almaityndyǵy týraly zań kúshine endi. Bul neni bildiredi? Qazirgi ýaqytta elordada qardan tazartý máselesin kórip otyrsyzdar. Tipti qardy tasymaldaý kezinde de kez kelgen samosval júk tasymaldaý parametrlerinen asyp túsedi. Bul qazirgi qoldanystaǵy zańmen tipti qar tasymaldaý múmkin emes degendi bildiredi. Biz bul máseleni sheshýdiń mynadai joldaryn usynamyz: jol salý kezinde kólik osine berilgen júktemelerdi qaita qaraý. Biz inertti materialdy temirjolmen Reseige, Ombyǵa, Cheliabinskke jiberemiz, ol jaqta qiyrshyq tas joq. Bizde osyndai bai óńir bar - ózimizdiń qiyrshyq tastarymyz, óz asfaltymyz, óz betonymyz, óz armatýramyz bar. Jol salý kezinde ostik júktemeni zańnamalyq turǵydan kúsheitýge ne kedergi ekenin túsinbeimin. Bul jaǵdaida jyl saiyn jol jóndeýge milliondaǵan aqsha jumsamas edik. Sonymen birge, biz jol salatyn kásiporyndarmen tehnikalyq-ekonomikalyq negizdeme jasadyq, olar bizdiń seriktesterimiz bolyp sanalady - smetada júktemeni tek 10% kóterýdiń ózi os júktemesin 13-ten 18 tonnaǵa deiin arttyrady. Sondyqtan, negizdemeni jaqsartý qajet», - dedi A. Kemelbaiuly.
