Dziýdodan Tokio Olimpiadasynyń qola júldegeri atanǵan Eldos Smetov Olympic.kz saityna suhbat berip, ekinshi Olimpiadadaǵy ekinshi medaline qatysty oiymen bólisti.
«Shyny kerek, men qola emes, altyn alamyn dep keldim. Rio Olimpiadasynan keiin tatamiden alystap ketpei, úlken sportta qalýymnyń da bir sebebi osy edi. Kúmisten keiin altyn alǵym keldi. Elimizdiń ánuranyn sharyqtatyp, kók bairaǵymyzdy biikten kórýdi armandadym. Sol úshin tynbai eńbek ettim de. Biraq maǵan buiyryp turǵany qola júlde eken.
Men barymdy saldym. Sportqa arnaǵan osynsha jyldaǵy bar ónerimdi, bar kúshimdi búgin Tokio tatamiine tastap shyqtym. Boiymda kúreske degen qandai qasiet bolsa, sonyń birin de aiap qalmadym. Jartylai finaldaǵy jekpe-jekti kórdińizder. Óte tartysty ótti. Qaita-qaita shabýylǵa iek artyp, qarsylasymdy tuqyrtýǵa tyrystym. Alaida, jeńis búgin meniń jaǵymda emes eken.
Iá, japondyq balýan Naohisa Takato menimen kezdesýge finaldyq beldesýge shyqqandai daiyndyqpen keldi. Onyń finalǵa jáne oǵan deiingi jekpe-jekterge qalai daiyndalǵanyn kórdim. Jartylai finalǵa erekshe ásermen bettedi. Ekeýmiz talai márte kezdesip júrmiz. Bir-birimizdi jaqsy bilemiz. Búgingi beldesýdiń tym uzaqqa sozylǵanynyń sebebi de osy.
2020 jyldyń basynda biz naǵyz babymyzda boldyq. Alaida, álemdegi pandemiia salqynyn tigizdi. Segiz-toǵyz ai boiy birde bir jarysqa qatysqan joqpyz. Dese de, bul kúnderdiń bári artta qaldy, qiyndyqtyń bárin jeńip shyqtyq. Soǵan qýanamyn.
Al kelesi Olimpiada týraly ne aitýǵa bolady? Parij Olimpiadasyna barý-barmaýym jaily eshteńeni kesip aita almaimyn. Óte aýyr suraq. Maǵan áli tynyǵyp, densaýlyǵymdy durystaý kerek. Sizderge kórinbegenmen, meniń ǵana janyma batatyn jaraqattar bar. Solardy emdeý kerek. Joǵaryda aittym, meniń armanym – Olimpiada altynyn alý. Mine, ekinshi Olimpiadada altynǵa synyq súiem jerden toqtap otyrmyn. Men almasam da, meniń baýyrlarym, qazaq dziýdoshylary Olimpiada chempiony atansa, sodan artyq baqyt joq!
Jarys munymen bitken joq. Áli elimizdiń namysyn qorǵaityn tórt balýanymyz bar. Solarǵa sáttilik, jeńis tileimin», - dedi Smetov.
