Ekologiia, geologiia jáne tabiǵi resýrstar ministri Serikqali Brekeshev Kókjailaý shatqalynyń Ile Alataýy ulttyq parkiniń quramyna qashan qaitarylatynyn aityp berdi, dep habarlaidy QazAqparat.
Ministr 2020 jylǵy 30 qyrkúiekte qordaǵy jerlerdi erekshe qorǵalatyn tabiǵi aýmaqtardyń jerlerine aýystyrý tártibin retteitin zań qabyldanǵanyn eske saldy.
«Atalǵan zańnyń qabyldanýy Kókjailaý jobasynyń jerlerin Ile-Alataý ulttyq parkiniń quramyna qaitarýǵa negiz boldy. Búginde jer kólemi shamamen 1000 gektardy quraidy, qazirgi ýaqytta Ile-Alataý ulttyq parkine jer berý týraly Úkimet qaýlysynyń jobasy ázirlenýde», - dedi ministr Ortalyq kommýnikatsiialar qyzmetinde ótken brifingte.
Ministrdiń aitýynsha, qaýly jobasyn kelisý jáne ony bekitý rásimi shamamen bir aiǵa sozylady, al Kókjailaýdy Ile-Alataý ulttyq parkiniń quramyna qaitarý protsesi jyl sońyna deiin aiaqtalmaq.
