Qaldyqtardyń klassifikatsiiasy Eýropalyq katalogqa sáikestendirildi. Bul týraly Senattyń jalpy otyrysynda Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy QazAqparat.
Onyń aitýynsha, óndiris jáne tutyný qaldyqtary máselelerin sheshý maqsatynda qaldyqtarmen jumys isteý salasyndaǵy terminologiia men erejeler halyqaralyq talaptarǵa sáikes keltirilgen.
«Jobada qaldyqtarmen kezeń-kezeńimen jumys isteýge baǵyttalǵan qaldyqtar ierarhiiasy qarastyrylǵan. Bul degenimiz, eń aldymen, jinalatyn qaldyqtardy azaitýǵa baǵyttalǵan norma. Jinalǵan qaldyqtardy qaita paidalaný, qaita óńdeý, kádege jaratý qajet. Tek osydan keiin ǵana poligondarda kómý qajettiligin qarastyrý kerek. Sondai-aq, halyqty turmystyq-qatty qaldyqtardy jinaýdyń, kádege jaratýdyń jáne qaita óńdeýdiń, qaldyqtardy bólek jinaýdyń ratsionaldy júiesi týraly habardar etý júzege asyrylatyn bolady», - dedi ministr QR Ekologiialyq kodeksiniń jobasyn talqylaý kezinde.
Osy oraida ol qaldyqtardyń klassifikatsiiasy Eýropalyq katalogqa sáikestendirilgenin jetkizdi.
«Onda qaýipti emes te, qaýipti de qaldyqtardyń tizbesi kórsetiledi. Bul rette, zańsyz qoqys tastaý máselesin júieli túrde sheshý úshin jańa Ekologiialyq kodekste qoqys shyǵaratyn kólikterge GPS-datchikterdi mindetti túrde ornatý máselesi kózdelgen», - dedi Myrzaǵaliev.
