QR IIM TJK Almaty mańyndaǵy qoqys poligonyndaǵy órtti sóndirý jumystary týraly aitty, dep habarlaidy QazAqparat.
Kúni keshe QR IIM Tótenshe jaǵdailar komitetiniń tóraǵasy Vladimir Bekker qoqys poligonyndaǵy órtti sóndirýge aviatehnikanyń kómektese almaitynyn aitqan edi. Alaida tilsiz jaý týyndatqan máseleni júieli sheshý úshin búgin kókke eki tikushaqtyń kóterilgeni belgili boldy.
«Almaty mańynda qoqys poligonyndaǵy órtti sóndirý jumystaryna qazirgi ýaqytta avtotsisternalar, sý tasýshy tehnikalar men arnaiy tehnikalar jumyldyrylýda. Sóndirý jumystary 17 mamyr kúni saǵat 03.00-ke deiin sozylyp, 3 saǵattan keiin qaitadan (saǵat 06.00-da) jalǵasty», - dep habarlaidy TJK baspasóz qyzmetinen.
Qazirgi ýaqytta tutanǵan aýmaqty perimetri boiynsha sýmen sóndirý jáne topyraqpen jabý jumystary júrgizilýde. Saǵat 07.00-den bastap eki tikushaq 30 ret kókke kóterilip, 90 tekshe metr sý shashqan. Sonymen birge, jaǵdaidy baqylaýda ustaý úshin Matritsa-600 kvadrokopteri qoldanylýda.
Eske sala ketsek, Almaty turǵyndary tańnan beri qala aspanyn ys pen tútin torlaǵanyn aityp, shaǵymdanǵan edi.
Áleýmettik jeli qoldnaýshylarynyń boljaýynsha, tútin Almaty oblysyndaǵy qoqys poligonynan kelgen. Tótenshe jaǵdailar komiteti bul aqparatty rastady.
«16 mamyr kúngi túngi saǵat 2:30-da órtke qarsy qyzmetke Qarasai aýdanyna qarasty Áitei aýylynan 7 shaqyrym jerde qoqys poligony janyp jatqany týraly habar túsken. Qatty turmys qaldyqtardan tutanǵan órttiń aýmaǵy bir gektardy qamtydy degen boljam bar. Qurban bolǵan nemese zardap shekkender joq» - delingen Komitettiń málimetinde.
Dese de, Almaty qalasynyń Tótenshe jaǵdailar departamenti qoqys poligonyndaǵy órt saldarynan shahardyń aýasy shekten tys lastanǵany týraly aqparattyń shyndyqqa janaspaitynyn jetkizdi.
