Almatyda Kóktóbe bókterinde tutanǵan órt sóndirildi, dep habarlaidy QazAqparat.
«Órttiń jeke sektorǵa aýysýynyń aldyn aldyq. Tikushaqtar qaitaryldy. Sýdy laqtyrý jumystary 12 ret oryndaldy. Sýdyń jalpy kólemi 36 tekshe metr. Bul - osyndai jalyndardy aýyzdyqtaýda sheshýshi qural bolyp tabylady. Ot tolyǵymen sóndirildi. Órt sóndirý qyzmetiniń jeke quramy kezekshilik atqarý úshin oqiǵa ornynda qaldy», - dep jazdy Facebook-te Almaty qalalyq Tótenshe jaǵdailar departamentiniń basshysy Serik Áýbákirov.
QR IIM Tótenshe jaǵdailar komitetiniń resmi ókili Nursultan Nurahmetovtyń málimetinshe, dalaly alqaptaǵy órt saǵat 19.58-de tolyǵymen óshirildi.
Kóktóbedegi tótenshe jaǵdaidy joiýǵa eki tikushaq jumyldyrylǵan bolatyn. Sondai-aq oqiǵa ornynda TJD-nyń 42 adamy men 9 tehnikasy, «Almaty Tazalyq» MKK-nyń – eki jáne Almaty qalalyq Qutqarý qyzmetiniń bir sýarý tehnikasy jumys istedi.
