Kóktemde 276 eldi mekendi sý basý qaýpi saqtalyp otyr. Bul týraly QR Tótenshe jaǵdailar birinshi vitse-ministri Ibragim Kúlshimbaev aitty, dep habarlaidy «Ult aqparat».
«Sý tasqyny kezeńin qaýipsiz ótkizý máseleleri elimizdiń Úkimetiniń, Tótenshe jaǵdailar ministrliginiń, óńirlerdiń ákimdikteri basshylyǵynyń erekshe baqylaýynda. Osy maqsatta jyl saiyn sý tasqyny kezeńinde tótenshe jaǵdaidyń týyndaý qaýpin azaitýǵa baǵyttalǵan is-sharalar kesheni júrgiziledi. Bizdiń ministrlik eldegi ótken jyldar ishindegi tájiribeni eskere otyryp, kóktemde sý astynda qalýy múmkin 900-den astam eldi mekendi aiqyndady», - dedi ol Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, 2017 jyly ázirlengen Sý tasqyny qaýpiniń aldyn alý jáne joiý jónindegi jol kartasy 315 eldi mekendi qorǵaýǵa, 314 aýyl men eldi mekenge tónetin táýekeldi tómendetýge múmkindik berdi. 4 jyldyń ishinde 400-den astam injenerlik-qorǵanys is-sharalary júzege asyryldy.
«Degenmen, 276 eldi mekendi sý basý qaýpi saqtalyp otyr. Osyǵan orai, ótken jyldyń sońynda Tótenshe jaǵdailar ministrliginiń bastamasymen múddeli memlekettik organdarmen birge 2023 jylǵa deiingi jol kartasy ázirlendi»,- dedi Ibragim Kúlshimbaev.
