Bul fotolardyń avtorlary ártúrli. Sebebi munda birneshe elden jinalǵan túrli foto bar. Bireýler merekeni toilaý barysynda tushpara túiip jatsa, ekinshisi arystandar biin bileýde. Bireýler batpyrýyqpen oinasa, taǵy bireýler otshashý uiymdastyryp jatyr.
Biyl Qytai jańa jyly 2 aqpanda bastalady. Osy airyqsha kúnge orai Qytai Halyq Respýblikasynyń elshiligi men Qazaqstannyń Ulttyq mýzeii birlese «Kóktem merekesi» fotokórmesin uiymdastyrdy.
Ulttyq mýzei direktorynyń orynbasary Abai Satybaldinniń aitýynsha, elshilik pen Ulttyq mýzei ótken jylda 6 fotokórme uiymdastyrǵan. 2019 jyldaǵy elshiliktiń alǵashqy kórmesi shyǵys kúntizbesi boiynsha qytailyqtardyń jańa jyl – kóktem merekesine arnaldy.
«Ulttyq mýzei osy ýaqytqa deiin qytai elshiligimen birlesip, birneshe shara atqardy. Byltyrǵy jyldyń ózinde 6 bólimnen turatyn «Tańǵajaiyp Qytai» fotokórmesi uiymdastyryldy. Mine, búginde qystyń qaq ortasynda turyp, kóktem týraly aitý qyzyq ári saǵynysh sezimin oiatady. Bul – tabiǵat merekesi. Qytailyqtar kóktem men qys kezdesken kezde eskini shyǵaryp salyp, jańany qarsy alady. Tabiǵat ananyń beretin syiyna alǵys aitady eken. Iaǵni kóktem merekesi Qytai órkenieti men tabiǵaty arasyndaǵy tyǵyz bailanysty kórsetedi. Búgingi kórme naq osy taqyrypqa arnalǵan. Osy oraida, bizdiń elshilikpen mýzei, mádeni yntymaqtastyǵymyz ári qarai jalǵasady degen úmittenemin», - dedi direktordyń orynbasary kórmeniń ashylýynda.
Qytai Halyq Respýblikasynyń Qazaqstan Respýblikasyndaǵy tótenshe jáne ókiletti elshisi Chjan Siaonyń aitýynsha, qytailyqtardyń jańa jyl merekesi – Chýn Tszeniń tórt myń jyldyq tarihy bar.
«Búgingi kórmemiz qytai jańa jyly Chýn Tszege – kóktem merekesine arnalady. Qytaida Chýn Tszeniń tórt myń jyldan astam tarihy bar. Bul mereke – qytailyqtar úshin eń erekshe, kóńildi, súiikti, saltanatty meiramdarynyń biri. Jai mereke ǵana emes, ulttyq mádeniettiń bir bólshegi. Chýn Tszemen bailanysty túrli ańyz bar. Al búgingi kórmemiz – álem elderiniń «Kóktem merekesin» qalai atap ótetinin baiandaityn erekshe kórme», - dep túsindirdi kórmeniń mánin elshi.
