Kókshetaý tehnikalyq institýtyna Málik Ǵabdýllin atyndaǵy azamattyq qorǵaý akademiiasy mártebesi berildi. Bul týraly Tótenshe jaǵdailar ministrliginiń baspasóz qyzmetinen málim etti, dep habarlaidy "Ult aqparat".
«QR Úkimetiniń Qaýlysymen Tótenshe jaǵdailar ministrliginiń Kókshetaý tehnikalyq institýtyna Málik Ǵabdýllin atyndaǵy azamattyq qorǵaý akademiiasy mártebesi berildi», - dedi ministrliktiń baspasóz qyzmetinen.
Atalǵan oqý orny 1973 jyldan beri tótenshe jaǵdai mamandaryn daiyndap keledi. Osy jyly Almaty qalasynan Kókshetaýǵa Qazaq KSR IIM basqarmasynyń áskerilendirilgen órt kúzetiniń oqý jasaǵy kóshiriledi. Keiin órt kúzetiniń kishi jáne orta basshy quramyn daiarlaý jáne qaita daiarlaý mektebine, keiin QR IIM Almaty órt-tehnikalyq ýchilishesiniń Kókshetaý filialyna ainaldy. 1999 jyly Qazaqstan Respýblikasy Tótenshe jaǵdailar jónindegi agenttiginiń Kókshetaý tehnikalyq institýty bolyp qaita ataldy. Al 2004 jyldyń 29 qyrkúieginen bastap QR TJM Kókshetaý tehnikalyq institýty bolyp tirkeldi.
«Búgingi kúni institýt 4 bilim berý baǵdarlamasy boiynsha bilikti mamandardy daiarlaidy: «Órt qaýipsizdigi», «Tótenshe jaǵdailarda qorǵaý», «Azamattyq qorǵanys kúshteriniń komandalyq taktikalyq qutqarý isi» jáne «Órt sóndirý jáne avariialyq-qutqarý isi». Institýtta kúndizgi, qashyqtyqtan oqytý, qosymsha bilim berý jáne joǵary oqý ornynan keiingi bilim berý fakýltetteri jumys isteidi.
Oqý orny óz tarihynda 5 myńnan astam maman daiarlaǵanyn atap ótken jón», - dep jazylǵan ministrlik málimetinde.
