Volonterler jyly Kókshetaýda volonterler ortalyǵy ashyldy, dep habarlaidy QazAqparat.
Ortalyq qaladaǵy volonterler men «Feniks» jáne «Lider KZ» volonterlik qozǵalys ókilderiniń basyn biriktiredi.
Kókshetaý qalalyq mádeniet jáne tilderdi damytý bólimi, Azamattyq qorǵanystyń kópbeiindi joǵary kolledji jáne «Arna» Kókshetaýdyń joǵary kolledji arasynda ózara áriptestik týraly memorandýmǵa qol qoiyldy.
Uiymdastyrýshylardyń aitýynsha, Kókshetaý qalalyq mádeniet jáne tilderdi damytý bóliminiń volonterleri tarihi-mádeni murany saqtaýǵa, óńirlik, aimaqaralyq, respýblikalyq mádeni-buqaralyq sharalardy uiymdastyrýǵa atsalyspaq.
Aǵymdaǵy jyl mereitoilarǵa toly jyl, sondai-aq, oblys ortalyǵynda 1,5 myńnan astam adamnyń qatysýymen Qazaqstan jáne Reseidiń áriptestik jónindegi aimaqaralyq forýmy ótedi.
Azamattyq qorǵanystyń kópbeiindi joǵary kolledjiniń 4 kýrs stýdenti Valeriia Garbýz volonterlik qyzmeti týraly aitty.
«Bári kolledjdiń volonter tobyna qosylýynan bastaldy. Aldymen biz qariialarǵa kómektestik. Qar tazalap, úilerdiń aýlasyn jinadyq. Ótken jyly kolledjden qarajat jinap, jalǵyzbasty qariialarǵa azyq-túlik satyp áperdik», - dedi volonter Valeriia Garbýz.
Qazirgi kezde, ol kórshi turatyn 93 jastaǵy qariiany óz qamqorlyǵyna alypty.
