Kókshetaýda burshaq aralas nóser jańbyrdan qala kósheleri men turǵyn úi aýlalaryn sý basyp qaldy, dep habarlaidy QazAqparat.
Jańbyr sýy kólik qatynasyna, ásirese jaiaý adamdardyń qozǵalysyna qiyndyq týǵyzdy.
Qala turǵyndary sý basqan úi aýlalaryn videoǵa túsirip, áleýmettik jelige jarysa jariialady. Sonyń biri – «Vasilkovskii 27» shaǵyn aýdanynyń turǵyny Aleksandr Bondarenko.
«Ádettegidei, bizdegi jertóleler sýǵa toldy. Tipti, úiden shyǵa almai otyrmyz», - deidi ol iýtýb-kanalynda.
Beinejazbadan adamdardyń shalshyq sýdy tizeden keship bara jatqanyn kórýge bolady.
Qaladaǵy birqatar kóppáterli turǵyn úidiń tóbesinen de sý sorǵalap, turǵyndardy biraz ábigerge saldy. «Stantsionnyi» jáne «Jailaý» shaǵynaýdandaryndaǵy jekemenshik úilerdiń aýlasyna da sý ketkeni belgili boldy. Nazarbaev pen Severnaia kósheleriniń qiylysynda shalshyq sý jinaldy. Sonymen birge, ortalyq bazar aýmaǵynda da saýdagerler men turǵyndardyń qozǵalysy qiyndady.
