Kókshetaýda kýrsantty basynan temirmen urǵan QR TJM Azamattyq Qorǵaý akademiiasynyń qyzmetkerine qatysty sot úkimi shyqty. Er adam «Azamattyq qorǵaý aǵa leitenanty» arnaýly ataǵynan aiyryldy jáne synaq merzimimen shartty túrde bes jylǵa sottaldy, dep habarlaidy QazAqparat.
Aqmola oblystyq soty baspasóz qyzmetiniń málimetinshe, qylmystyq is kelisý óndirisinde qaraldy.
«Sot anyqtaǵandai, M.Ǵabdýllin atyndaǵy azamattyq qorǵaý akademiiasynyń 1-kýrs bólimshesiniń oqý-saptyq vzvodynyń komandiri K. akademiia jataqhanasynyń ǵimaratynda, kýrsanttardyń jeke bos ýaqytynda jarǵylyq tártipti buza otyryp, tártip pen ishki tártip jaǵdaiy týraly áńgime júrgizý nietimen kýrsanttardy shaqyrǵan. Áńgime barysynda kámeletke tolmaǵan kýrsant N. basynan metall qubyrmen uryp, onyń densaýlyǵyna jeńil ziian keltirgen.
Is júrgizý kelisimimen K. ókilettigin asyryp, kámeletke tolmaǵan N. denesine ziian keltirgenin, iaǵni óziniń kinásin moiyndady», - dep atap ótti vedomstvodan.
Sot qylmystyq jaýaptylyqty jeńildetetin mán-jailardy jáne sottalýshynyń ókinýi, belsendi túrde qylmystyq quqyq buzýshylyqty ashýǵa yqpal etýi, sottalmaǵandyǵy tárizdi birqatar mán-jailardy eskerdi.
Aqmola oblysy Kókshetaý qalalyq sotynyń úkimimen K. 1-tarmaqta kózdelgen qylmysty jasaǵany úshin kináli dep tanyldy.
QR QK 362-babynyń 4-bóligi (bilikti jáne laýazymdyq ókilettikterdi asyra paidalaný) jáne oǵan shartty túrde, synaq merzimimen bes jyl merzimge bas bostandyǵynan aiyrý jazasy taǵaiyndaldy. Er adam «Azamattyq qorǵaýdyń aǵa leitenanty» arnaýly ataǵynan aiyryldy.
«Probatsiialyq baqylaý ornatylyp, oryndaý mindetteri júkteldi: turaqty turǵylyqty jerin, jumysyn ózgertpeý, ýákiletti memlekettik organnyń ruqsatynsyz basqa jerlerge ketpeý. Sottalǵan K.-dan jábirlenýshilerdiń ótemaqy qoryna 20 ailyq eseptik kórsetkish mólsherinde 58340 teńge jáne júrgizilgen saraptamalar úshin sot shyǵyndary óndirip alyndy», - dep tolyqtyrdy vedomstvodan.
Sot úkimi zańdy kúshine engen joq.
