Kókshetaý qalalyq kópbeiindi aýrýhanasynyń juqpaly aýrýlar stantsonarynan koronavirýspen aýyrǵan júkti áielderdiń sońǵysy jazylyp shyqty, dep habarlaidy "Ult aqparat" COVID-19 baspasóz ortalyǵyna silteme jasap.
Vedomstvonyń málimetinshe, áiel júktiliktiń 41 aptasynda qanaǵattanarlyq jaǵdaida túsken. Taldaý onyń koronavirýsqa shaldyqqanyn rastady.
«Júkti áiel tamyzdyń 13-de tústi. Odan qaýipti derttiń belgileri baiqalmady. Áiel ishtegi sharananyń qimyly álsiz ekenin aitty. ÝDZ men KTG keiin «sharananyń jaǵdaiy qaýipti» diagnozy qoiyldy», - deidi akýsher-ginekolog Sarjan Qalmuratov.
Dárigerler shuǵyl túrde kesar tiligin jasaý arqyly áieldi bosandyryp alady. Sábidiń densaýlyǵy jaqsy.
«Náresteni dárigerler birden anasynan oqshaýlap, baqylaýǵa aldy. Bizdiń neonatologtar táýlik boiy sábidiń janynda boldy. Em alǵan ýaqytta anasy men sábiin baqylap otyrǵan akýsher Anna Sherengovskanyń eńbegin erekshe atap ótýge bolady», - dep tolyqtyrdy dáriger.
Arada alty táýlik ótken soń alynǵan qorytyndy taldaý ana men balanyń saý ekenin kórsetip, olar úiine jiberildi.
«Rengent zertteý kezinde bosanǵan áieldiń ókpesi qabynǵany baiqalmady. Sol sebepti ol balasymen birge úiine shyǵaryldy», - dep tolyqtyrdy Qalmuratov.
Jalpy, Kókshetaý qalalyq kópbeiindi aýrýhanasynyń juqpaly aýrýlar stantsonary ashylǵannan beri munda 33 áiel (onyń 22-si kesar tiligi arqyly) bosanyp, 34 sábi dúniege keldi.
