Táýelsizdiktiń 30 jyldyǵy qarsańynda QR TJM Málik Ǵabdýllin atyndaǵy Azamattyq qorǵaý akademiiasynyń 146 kýrsanty ant qabyldady, dep habarlaidy "Ult aqparat" TJM baspasóz qyzmetine silteme jasap.
QR Tótenshe jaǵdailar ministrligi Málik Ǵabdýllin atyndaǵy Azamattyq qorǵaý akademiiasynyń 1-kýrsyna alǵash ret qabyldanǵan 146 kýrsanttyń saltanatty túrde ant berý rásimi Kókshetaý qalasyndaǵy «Táýelsizdik» alańynda ótti.
Saltanatty sharaǵa Qazaqstan Respýblikasynyń Tótenshe jaǵdailar ministri Iýrii Ilin, Aqmola oblysynyń ákimi Ermek Marjyqpaev, sondai-aq Tótenshe jaǵdailar ministrliginiń bólim basshylary men azamattyq qorǵaý organdarynyń ardagerleri qatysty.
«Memleket basshysy Qasym-Jomart Toqaev Qazaqstan halqyna Joldaýynda qazirgi kezde qorǵanys qabiletin nyǵaitý, qaýip-qaterge qarsy áreket etýdi joǵarylatý óte mańyzdy ekenin atap ótti. Bul máseleni sheshýde Ministrliktiń rólin atap ótpeý múmkin emes. Búginde onyń myńdaǵan qyzmetkeri men áskeri qyzmetshileri joǵary kásibi jáne azamattyq qasietterdi kórsete otyryp, barlyq qaýipterge berik jáne abyroimen qarsy turady. Tótenshe jaǵdailardyń aldyn alý jáne olardy joiý salasyndaǵy bolashaq jeńister men tabystardyń negizi búgin bizdiń vedomstvolyq oqý ornynyń qabyrǵasynda qalanýda. Men búgin saltanatty quramda turǵan jastar eshqandai jaǵdaida da kýrsanttyń joǵary abyroiyn joǵaltpaitynyna senimdimin», - dedi Iýrii Ilin.
Rásim aiaqtalǵan soń kýrsanttar alań arqyly júrip ótti.
Eske salaiyq, biyl QR Úkimetiniń qaýlysymen Tótenshe jaǵdailar ministrliginiń Kókshetaý tehnikalyq institýtyna Málik Ǵabdýllin atyndaǵy Azamattyq qorǵaý akademiiasynyń mártebesi berildi.
El táýelsizdik alǵan jyldar ishinde Akademiia tabiǵi jáne tehnogendik sipattaǵy tótenshe jaǵdailardan jeke adamnyń, qoǵamnyń jáne memlekettiń qaýipsizdigin qamtamasyz etetin asa jaýapty jáne qiyn ýchaskelerde kúndiz-túni qyzmet etetin 5000-nan astam mamandy daiarlap shyǵardy.
Búginde Akademiia 4 bilim berý baǵdarlamasy boiynsha bilikti mamandardy daiyndaidy: «Órt qaýipsizdigi», «Tótenshe jaǵdaida qorǵaý», «Azamattyq qorǵanystyń komandalyq-taktikalyq kúshteri» jáne «Órt sóndirý jáne avariialyq-qutqarý isi».
Úkimetaralyq kelisimderdi oryndaý sheńberinde jyl saiyn 20 qazaqstandyq kýrsant Resei men Belarýs Respýblikasynyń TJM mamandandyrylǵan sheteldik joǵary oqý oryndaryna oqýǵa jiberiledi (Memlekettik órtke qarsy qyzmet akademiiasy - 5 úmitker, AGZ – 5, Memlekettik órtke qarsy qyzmetiniń Sankt-Peterbýrg ýniversiteti - 5, Belarýs Respýblikasynyń azamattyq qorǵaý ýniversiteti - 5).
Sonymen qatar Qazaqstan Respýblikasy men Qyrǵyz Respýblikasynyń Úkimeti arasyndaǵy ekijaqty úkimetaralyq kelisimder sheńberinde qazirgi ýaqytta memlekettik bilim berý tapsyrysyna sáikes Akademiiada Qyrǵyz Respýblikasynyń 11 azamaty bilim alýda.
