Foto:WNG2024
Jarys Astanadaǵy «Qazanat» ippodromda ótti.
5-shi Dúniejúzilik Kóshpendiler oiyndarynda Kókpardan ótken jarysta Qazaqstan quramasy AQSh quramasyn 12:4 eseppen jeńdi, dep habarlaidy "Ult Aqparat".
«AQSh quramasynyń oiyny burynǵyǵa qaraǵanda durystalyp qalǵan. Keshe kókbóri oinaǵan quramy búgin kókpar oinady. Erteń jartylai finalda Resei kókparshylarymen kezdesemiz. Tobymyzda bes qurama bolǵan soń finalǵa deiin úsh kezdesý ótkizýimiz kerek boldy. Al basty qarsylasymyz Qyrǵyzstan búgin Túrkiiany jeńse finalǵa shyǵyp tur», – dedi kókpardan ulttyq qurama bas bapkeri Abylai Mankeev.
Kókpar básekesine 9 memlekettiń quramasy qatysyp jatyr. Bul sport túrinen barlyǵy 104 sportshy synǵa túsedi. Kókpardan baq synaityn quramalar: Qazaqstan, AQSh, Resei, Ózbekstan, Qyrǵyzstan, Vengriia, Qytai, Mońǵoliia jáne Túrkiia.
Finaldyq oiyndar 12 qyrkúiekte ótedi.
Aita keteiik, búgin 5-shi Dúniejúzilik Kóshpendiler oiyndarynyń úshinshi kúni ótip jatyr. 10 qyrkúiekte kókpardan bólek, aýdaryspaq, jamby atý, dástúrli sadaq atý jáne qazaq kúresi men mas-restlingten jarys bolady. Sonymen qatar, kórermender bes asyq pen toǵyzqumalaqtan saiystardy da tamashalai alady.
