Búgin Úkimet otyrysynda jeti aidaǵy áleýmettik-ekonomikalyq damýdy talqylaý kezinde QR Saýda jáne integratsiia ministri Baqyt Sultanov azyq-túlik baǵasynyń ósýin tejeý úshin qandai qadamdar jasaý kerek ekenin aitty, dep habarlaidy QazAqparat.
«Baǵanyń odan ári ósýine jol bermeý úshin shuǵyl túrde tiisti sharalardy qabyldaý qajet dep paiymdaimyz. Birinshiden, ákimdikter biznes sýbektileriniń ústeme aqylar men shekti baǵalardan asyp ketýine jol bermeýge monitoring pen baqylaýdy kúsheitýdi, sondai-aq óńir turǵyndaryna belgilengen shekti baǵalar týraly habardy der kezinde jetkizýdi tapsyrýdy suraimyn. Ekinshiden, áleýmettik - kásipkerlik korporatsiialar arasynda taýar jetkizý jóninde naqty óńiraralyq kooperatsiiany qamtamasyz etý qajet. Bul rette Aýyl sharýashylyǵy ministrligine turaqtandyrý qorlaryna taýarlardy ózara jetkizýdi júzege asyrýǵa múmkindik beretin Erejelerge ózgerister engizýdi tapsyrýdy suraimyn», - dedi Sultanov Úkimet basshysyna qarata aitqan sózinde.
Onyń aitýynsha, qyrkúiek pen jeltoqsan aralyǵynda shekaralas elder tarapynan kókóniske degen suranystyń artýy baiqalady.
«Ónimniń baqylaýsyz elden shyǵarylýy oryn alǵan jaǵdaida, osy taýarlar eksportyn kvotalaýdy engizý qajet. Sondai-aq kókónis pen jemis-jidek qoimalarynyń fizikalyq jáne moraldyq turǵydan eskirgenin eskere otyryp, investitsiialyq sýbsidiialaý normasyn 25%-dan 50%-ǵa deiin ulǵaitý qajet. Bul Úkimettiń keńeitilgen otyrysynda Memleket basshysy bergen tapsyrmany oryndaý aiasynda qajet jáne biznesti yntalandyrýǵa, egindi jetkilikti mólsherde saqtaýǵa ári baǵanyń kúrt kóterilýine jol bermeýge múmkindik beredi», - dedi ministr.
