Qoqiqazdyń soltústiktegi turaqtaityn eń sońǵy núktesi - Qazaqstan. Kaspii teńizi mańyndaǵy Qarakólge ushyp kelgen bir top qoqiqaz naýryzǵa deiin osynda qonaqtaidy, dep habarlaidy "Ult aqparat".
Sýy jyly ári taiyz bolǵandyqtan qoqiqazdan bólek, qaz, úirek, aqqý da kóktem-kúzde osynda ushyp keledi. Jyldyń ár maýsymynda 60-qa deiin qanattylar kelse, onyń 20-dan astamy Qazaqstannyń Qyzyl kitabyna engizilgen.
Mańǵystaý simvoldarynyń biri sanalatyn qoqiqazdyń álem boiynsha 8 túri taraǵan. Sonyń 2 túri Qazaqstanda meken etedi. Sońǵy sanaq boiynsha, elimizde 15-18 myńdai qoqiqaz uia salady eken. Antarktidadan basqa barlyq qurlyqta mekendeidi. Ásirese, ózen saǵalarynda, sýy tuzdy, qyshqyl kólderde turaqtaidy.
Oblystyq orman sharýashylyǵy jáne janýarlar dúniesi aýmaqtyq inspektsiiasynyń bólim basshysy Turǵanbai Shapaǵatovtyń aitýynsha, Qarakólde naýryzǵa deiin turaqtap, demalady. Biraq jumyrtqalamaidy.
«Qarakól - Qyzyl kitapqa engizilgen qanattylar turaqtaityn meken. Sondyqtan da bul aýmaq tabiǵat qorǵaý inspektorlarynyń jiti baqylaýynda. Qoryqtyń aýmaǵyna kiredi. Qoqiqazdar Qarakólden basqa Túpqaraǵan aýdany tóńiregindegi Sartas, Qarajanbas jeri men Túlen araldarynda bolady. Ómir súrýge qaisysy qolaily bolsa, soǵan aýysyp otyrady. Kórip otyrǵanyńyzdai, aqpan aiynan bastap keldi. Kóktemge deiin osynda bolady. Olar munda jumyrtqalamaidy. Tek ýaqytsha demalady. Qarakól kólinde jyl saiyn kórýge bolady»,-deidi orman sharýashylyǵy jáne janýarlar dúniesi aýmaqtyq inspektsiiasynyń bólim basshysy Turǵanbai Shapaǵatov.
Qoqiqazdar osy jerde tynyǵyp, demalyp bolǵannan keiin Mańǵystaýdan da ystyq Túrikmenstan, Iran jaqqa qarai nemese Qorǵaljynǵa ushyp ketedi. Qarakólde biyl qysta eki myń aqqý, tórt myńǵa jýyq úirek tektes qustar meken etken.
Eske sala keteiik, biz buǵan deiin Kaspii teńizine bir top qoqiqaz ushyp kelgenin habarlaǵan edik.
