«Quqyqtyq media ortalyq» qoǵamdyq qorynyń direktory Diana Okremova BAQ salasynyń zańnamalyq damýyn jetildirýge qatysty birqatar usynys jasady, dep habarlaidy QazAqparat tilshisi.
«Pandemiia kezinde jýrnalister aqparatqa qol jetkizý problemasyna tap boldy. Naqty aitsaq, suraqqa jaýap alý qiyndap, jýrnalist suraǵan aqparatty qyzmet babymen ǵana paidalanýǵa bolatyn málimetter sanatyna negizsiz jatqyzý, saýaldyń jaýabyn sozyp júrip alý siiaqty keleńsizdikter jiiledi. Sheneýnikter aqparatty, ásirese biýdjetke bailanysty málimetterdi jasyrýǵa tyrysady. Sondyqtan, bizdiń ministrlikke baǵyttaityn usynymdarymyzdyń ishinde aqparatty túrli sanatqa bólýdi joiý máselesin qoiyp otyrmyz. Kei suraqqa 2 kúnniń ishinde, basqa suraqtarǵa 7 kúnniń ishinde jaýap berýge bolady deitin norma bar», - dedi Diana Okremova BAQ buqaralyq mediany zańnamalyq retteý týraly konferentsiia barysynda QazAqparat tilshisine bergen suhbatynda.
Onyń aitýynsha, bul jýrnalisterdi ǵana emes sheneýnikterdiń ózin de shatastyrady.
«Mysaly, aimaqtarda kóptegen adamdar jaýaby 2 jáne 7 kúnniń ishinde beriletin suraqtardyń aiyrmashylyǵyn túsinbeidi. Halyqaralyq standarttar boiynsha erekshe qyzmetpen bailanysty málimetterden basqa memlekettik organdarǵa tiesili aqparattyń bári ashyq bolýy kerek. Qazir bizdegi zańnama talaptaryn árkim qalaýynsha túsindirip júr. Olai bolmaýy úshin BAQ saýalyna jaýap berý merzimi naqty jazylýy kerek», - dedi sarapshy
Qoǵamdyq qor direktory «qyzmettik qoldanysqa arnalǵan aqparat» sanaty degen uǵymnyń aýqymyn shekteýdi usynyp otyr.
«Qyzmettik qoldanysqa arnalǵan aqparat máselesin de túbegeili sheshý qajet. Kez kelgen málimetti osy sanatqa negizsiz jatqyza berýge bolmaidy. Qazir bul óte ońai bolyp ketti. Kez kelgen ministrdiń nemese basqa laýazymdy tulǵanyń buiryǵy BAQ suraǵan málimetti «qyzmettik qodanysqa aqparatqa arnalǵan» sanatyna jatqyza alady. Zańnamada mundai sanatqa qai aqparat qandai jaǵdaida jáne qansha merzimge jatqyzylatynyn naqty atap kórsetý kerek.
Sonymen qatar, zańnamaǵa «qoǵamdyq múdde» uǵymyn engizý qajet. Eger qoǵamnyń qandai da bir máselege qyzyǵýshylyǵy bolsa, onda jýrnalisterdiń qoǵamdyq ómirge aralasýǵa, synǵa jáne sózderge erkin qatysýǵa quqyǵy bolýy tiis», - dedi qoǵam belsendisi.
