QR Densaýlyq saqtaý ministrligi Qoǵamdyq Densaýlyq saqtaý komitetiniń tóraǵasy - Qazaqstannyń bas sanitary Jandarbek Bekshin Naýryz meiramyndaǵy ýlanýdyń aldyn alý jóninde birqatar keńes berdi, dep habarlaidy QazAqparat tilshisi.
Spikerdiń aitýynsha, uzaqqa sozylǵan meiramnan keiin jiti ishek infektsiialary, tamaqtan ýlaný jaǵdailary kóbeiedi.
"Naýryz meiramy - kóktemgi jańarý simvoly, mahabbat, dostyq merekesi. Naýryzdy toilaǵanda kontsert qana bolmaidy, ártúrli taǵamdar molynan ázirlenedi - naýryz kóje, baýyrsaq, et, qazy, shujyq, qýyrdaq, jent syndy tez buzylatyn ónimder bar. Ásirese, jumyrtqa men qaimaq qosylǵan salattardy, kremi bar konditerlik ónimderdi, tartylǵan et qosylǵan bálish-rýletterdi uzaq saqtaýǵa bolmaidy", - dedi Jandarbek Bekshin Astanada ótken baspasóz máslihatynda.
Onyń aitýynsha, jappai qydyratyn oryndarda da taǵam qaýipsizdigine min bergen jón.
"Jappai qydyratyn oryndarda jeke adamdar satatyn tamaq ónimin, ádette naýryz kóje men qymyzdy satyp almaýǵa tyrysyńyz. Daiyn ónimniń, et, taýyq eti qosylyp pisiriletin taǵamnyń, káýap, hot-dog, sendvichtiń saqtalýyna nazar aýdaryńyz, olar tiisti temperatýrada saqtalýy, saýda ornynda mindetti túrde bolýy tiis tońazytqyshtarda saqtalýy kerek. Barlyq ónim oralǵan bolýy tiis, qaptamalarynda taǵamnyń shyǵarylǵan kúni, óndiristik kásiporyn ataýy kórsetiledi", - dedi ol.
Sonymen birge, Bas sanitarǵa "Saýda jáne oiyn-saýyq ortalyqtarynda, alańdarda taratylatyn Naýryz kóje qanshalyqty qaýipsiz?" degen suraq qoiyldy.
"Ákimdik uiymdastyrǵan jiyndarda beriletin naýryz kóje qaýipsiz. Sebebi ony arnaiy dámhanalar men meiramhanalarda daiyndaidy. Onda jalpyǵa taratatyn naýryz kóje jergilikti uiymdardyń jiti qadaǵalaýynan ótken. Al bir qýysta, shette belgisiz adamdar satatyn naýryz kójelerden saqtaný kerek", - dep jaýap berdi J. Bekshin.
Onyń aiýynsha, byltyr elimizdegi qoǵamdyq oryndarda tamaqtan ýlanýdyń 15 jaǵdaiy tirkelgen. Úide daiyndalǵan taǵamnan 6 adam ýlanǵan.
«Mereke kúnderi tabys tabýdy kózdeitin «kezdeisoq» kásipkerler bolady. Esh qujatsyz, belgisiz jaǵdaida, belgisiz adamdar ázirlegen taǵamdar óte qaýipti. Bul týraly departamentterge habar berý qajet. Odan bólek, kremdi-konditerlik ónimderdiń jyly jerde saqtalǵanyn kórseńiz, satyp almańyz. Arzan baǵada tamaq ónimderi satylsa da, ónimniń saqtalý merzimin muqiiat zerdeleńiz, sebebi jaramdylyq merziminiń bitýine 2-3 kún qalýy múmkin», - dedi Jandarbek Bekshin Astanada ótken baspasóz máslihatynda.
Sonymen birge, bas sanitarlyq dáriger kez kelgen tutynýshynyń satýshydan tiisti qujattardy talap etýge quqyly ekenin eske saldy.
«Satýshynyń jeke meditsinalyq kitapshasyn, ónimniń qujattaryn suratýǵa, ózińizge qandai kásiporynnyń qyzmet kórsetetin naqtylaýǵa tolyq quqylysyz. Eger narazylyǵyńyz bolsa, Qoǵamdyq densaýlyq saqtaý komitetiniń aýmaqtyq bólimshelerine nemese PD mamandaryna júginińiz», - dep keńes berdi Jandarbek Bekshin.
