QR Aqparat jáne qoǵamdyq damý vitse-ministri Bolat Tilepov ortalyq kommýnikatsiialar qyzmetinde qoǵamdyq keńesterdiń búgingi jai-kúii týraly málimet usyndy, dep habarlaidy QazAqparat .
«Ózderińiz bilesizder, qoǵamdyq keńes institýty 5 institýtsionaldyq reforma sheńberinde 2015 jyly engizilgen bolatyn. Osy ýaqyt tájiribesi kórsetkendei, olar qoǵam men biliktiń arasyn jalǵaýshy retinde óziniń tiimdiligin, jalpy qoǵam ómirine qajettiligin aqtai bildi. Mysaly, osy 5 jylda qoǵamdyq keńes tarapynan 20 myńnan astam normativtik qujat ótken bolsa, sonyń árbir onynshysy nemese 2 myńnan astam qujat keńesten ótpei, jetildirý úshin keiin qaitarylǵan. Iaǵni, azamattardyń ómirine tikelei áser etetin bul sapasyz qujattardiń kemshiligi der kezinde anyqtalǵan dep aitýǵa bolady», - dedi vitse-ministr.
Sondai-aq, ol qazir memlekettik organ basshylary qoǵamdyq keńester aldynda esep bere bastaǵanyn eske saldy.
«Taǵy bir mysal, jyl saiyn 1,5 myń memlekettik laýazym iesi qoǵamdyq keńes aldynda esep beredi. Bul degenińiz – qosymsha týyndaǵan máseleler men sheshimin tappai júrgen suraqtarǵa jaýap alý múmkindigi. Osy 5 jylda memlekettik qyzmettiń sapasyna qoǵamdyq monitoring aiasynda myńnan astam zertteý jasalyp, barshaǵa ortaq óte ózekti suraqtardy ashyq talqylaý nátijesinde uzyn sany 2 myńnan astam másele kóterildi. Mine, osynyń bári - kópshiliktiń ortaq máselesine kóz jumbai, qashan da minberden usynysyn jetkize biletin bizdiń belsendi azamattarymyzdyń aqysyz negizde atqarǵan úlken eńbeginiń jemisi, jalpy azamattyq qoǵamnyń jeńisi. Sondyqtan da, Prezidenttiń bastamasymen «Qoǵamdyq keńes týraly» zańǵa tiisti ózgerister men tolyqtyrýlar engizilip, osy jyldyń basynan bastap qoldanysqa endi», - dedi vedomstvo ókili.
