Aqparat jáne qoǵamdyq damý ministri Aida Balaeva «Qoǵamdyq baqylaý» týraly zań jobasyn ázirleitin jumys tobynyń quramyna Prezidenttik jastar kadrlyq rezervinen iriktelip shyqqan jastardy shaqyrdy, dep habarlaidy QazAqparat.
Aita ketsek buǵan deiin Aida Balaeva qoǵamdyq baqylaý fýnktsiiasyna ie uiymdardyń tizimin keńeitý kerektigin aitty. Onyń aitýynsha pandemiia kezinde 300-ge tarta belsendi azamat dári-dármek baǵasynyń turaqtylyǵy, gýmanitarlyq kómekti bólý, meditsinalyq uiymdardyń jumysyna qoǵamdyq baqylaý júrgizý jumystaryn atqarǵan.
«Qazir qoǵamdyq baqylaýshylar shaǵyn jáne orta biznes sýbektilerinde, halyq kóp jinalatyn oryndarda, saýda ortalyqtarynda qadaǵalaý jumystaryn júrgizip, maska men áleýmettik qashyqtyq rejiminiń saqtalýyn baqylaýda. Qai jerde zańsyz toilardyń ótip jatqanyn da anyqtap jatyr. Sol sebepti osy máselelerdiń bári de qoǵamdyq baqylaý týraly jeke zańnyń bolýy kerektigin aiqyndai túsedi. Ol týraly Prezident Joldaýynda aitqan edi. Biz búgingi kúni jumys tobyn qurdyq. Ol atalmysh zańnyń kontseptsiiasyn daiyndaidy», - dedi Aida Balaeva Prezidenttik kadrlyq rezervtegi jastarmen kezdesý barysynda.
Ministrdiń aitýynsha ol jumys tobyna úkimettik emes uiymdardyń ókilderi, halyqaralyq jáne qazaqstandyq sarapshylar, Ulttyq keńes músheleri enedi. Aida Balaeva osy jumys tobyna atalmysh jiynda Prezidenttik jastar kadrlyq rezervinen iriktelgen azamattardy da shaqyrdy.
«Zań jobasynyń negizgi novellalary qoǵamdyq damý institýttaryn jetildirýge baǵyttalǵan. Sonymen qatar bul zań memlekettik organdar men kvazimemlekettik organdardyń ashyqtyǵy men eseptiligin qamtamasyz etedi», - dedi ol.
Eske sala ketsek búgin elordada Prezidenttik kadrlyq rezervtegi jastar birqatar ministrmen kezdesý ótkizdi. Naqtyraq aitqanda iriktelip, rezervke engen jastarmen kezdesýge Aqparat jáne qoǵamdyq damý ministri Aida Balaeva, Tsifrlyq damý, innovatsiialar men aeroǵarysh ónerkásibi ministri Baǵdat Mýsin, Prezident ákimshiligi basshysynyń orynbasary Málik Myrzalin, sondai Prezidenttiń kómekshisi Erlan Qarin shaqyrylǵan. Basqosýdyń basty maqsaty – Prezident Joldaýyn talqylap, aldaǵy ýaqytta Prezidenttik jastar kadrlyq rezervin damytyp, júzege asyrýdy josparlaý.
